Ezekiel 5 - Angami Naga CL (Re-edited) Bible (BSI)

Zhiecha Puo Jerusalem Perhiekecü

¹ Siro no, he-i themiau, zhiecha puoü vi secü puo seliecie, süu pie mia tsü thieyakezha tsüpfü puo chü di selie, süu pie n tsü mu n tiemie thiewalie, cüsie mha kemejü puo selie, sidi n thako kezalie.

² Sidi mia rekecüu tseita tse, nadiu nunu mi pie süu se-zapuo thewalie; no se-zapuo chülie, sidi zhiecha puo pie rewalie; siro se-zapuo pie teikhrie nu kezawaliecie, sitse ae zhiecha shüzoulie di uko siepie tuo ho.

³ Siro noe süko donu huoyo chüliecie, sidi süko pie n nei nu phaliecie.

⁴ Süsie süko nunu no huoyo chü lalie di kelhoupie mi nu shü di süko thewalie; sünunu miü puo par di Israel kiu pete petsoutuo.

⁵ Niepuu Jihovae puya: Haue Jerusalem we; ae puo pie puokhie puomhou keba seyieko metsuo nu shüshü.

⁶ Derei puoe a zhoko mu a kepethadieko petsoute, seyieko mu rünako puokhie puomhou houpfü kebako pete ki rei suokuote, a zhoko melie mu a kepethadieko medzi mvüte.

⁷ Süla Niepuu Jihovae puya: Kekreilamonyü niekoe nie khieümhoura ketuo seyieko ki rei suokuote, sidi a kepethadieko medzi mvü mu a zhoko se ba mvüte, derei seyie nie khieümhou ketuoko zhoko medzite.

⁸ Süla Niepuu Jihovae puya: A, a thuo nie petsoutuoü vorzhie, sidi ae seyieko mhinguki nu nie gei theca chüshütuo.

⁹ Siro no kerütsekecü pete chükecü la, a n gei thiedzü chüshü kemo tsiu hasietsa rei chüshülie kelhopfü chüshütuo.

¹⁰ Ketho zo, miapuonuoko nieko donunu u nuonuoko chü cütuo, tsiu u nuonuoko rei upuonuoko chü cütuo; a nieko capi chütuo, siro nieko lhiepie kebako pete ae kezapie teikhrie pete nu shüwatuo.

¹¹ Süla a rhei tuoyakezha tuoi, Niepuu Jihovae puya: Ketho zo, nieko mha kerütsekecü pete pie a kemesachüu bie perhuwata zo, süla a rei nieko dathewatuo; a mhi-e ngu jowalie lho, mu a mia ngumezhieshülie lho zo.

¹² Nieko se-zapuo thesa se chütuo, morei pekrie bu nieko donunu nieko cü pejüwatuo; tsiu ae se-zapuo kezapie teikhrie pete nu shüwatuo, sidi ae zhiecha shüzou se uko whuotuo.

¹³ Hai zo di a nouyieu pevotuo, sidi a a noupfhüu bu uko gei tsutuo, di a neitatuo, sitse ukoe a noupfhüu rupie uko gei keshü, a Jihova thuo a ro di pukeshü silietuo.

¹⁴ Süsie rei a n chüpie n bu seyie n khieümhou kebako donu, tsiu n pfüthe kevo pete bu n krenyü mu khakewa puo chütatuo.

¹⁵ Niekoe mia krenyü chü mu mia bu melekecü chütatuo, n khieümhou keba seyieko bu se u pethakecü puo mu uko bu süu la michieketuo puo chütatuo, a nouyie mu noupfhü se n gei capi chüshü mu siazha kemeriekecü khakeshü ki, a Jihova thuo pushüte,

¹⁶ a nieko petsou di pekriekecü, kesia theüko, kepeka theüko ketsepie nieko pekakeshü ki, sidi a pekriekecü chü pekrashü mu nieko kecüca bie pejükewa ki.

¹⁷ Ae pekriekecü mu nhachü kekhriekezei ketsepie nie petsoutuo, siro ukoe nie nuonuoko rügulietuo, thepe tsiu thezie pekrukecü nie pfüthe votuo, mu zhiecha se nieko gei vortuo. A Jihova thuo hau pushüte.