Ezekiel 44 - Angami Naga CL (Re-edited) Bible (BSI)

Khapie Ketha Careu

¹ Süsie puo a ze la chazoutsa keba kehoukiu niathutsa petsou keba careu nu vor; mu süu khapie ba.

² Sitse Jihova sie a ki, care hau khapie ba zotuo; hau khrüshülie lho, mu miapuorei hau ze lelie lho; kekreilamonyü Jihova Israel Kepenuopfüe hau ze letakecü la; süla hau khapie ba zotuo.

³ Kedinuou rübei, puoe kedinuocü la puoe Jihova mhodzü mhacütuo üdi sünu balie vi, puoe careu kifükhrotsa ze di letuo, mu cha süu ze di la pratuo.

Rüsuoki nu Lelie Kevi

⁴ Süsie puoe a ze rüsuokiu mhodzünu care pesotsa kebau cha ze vor; sidi a mehoshü ru harie, Jihova zayieu thuo Jihova rüsuokiu tshupfü bata, ru a zerepfü zhüta.

⁵ Sitse Jihova a ki: Themiau, le touliecie, penuo di mehoshülie, sidi a n ki Jihova kiu kemesa zhoko mu puo zhoko pukeshü pete rünyü menuoliecie; sidi suomia rüsuoki nu lelie vi shi, tsiu suomia kemesachüu nu lelie suo shikecüko le menuoliecie.

⁶ Siro no mia petsouyakezha kiu, Israel kinuko ki pushülie, Niepuu Jihovae puya: He-i Israel kiu, nie mha kerütsekecü chüyakezha pete bu puo thela chütaliecie,

⁷ chazoumia ze lekecü, u nou mu u chü gei u zhürekemomia, bu a kemesachü nu batuoü, sidi nieko kecüca, chüshuo mu thezie pie ruosuo kechü ki a kerüsuokiu bie perhuwaya. Nieko mha kerütsekecü kechü pete la a dietseidiekho-u varhuowate.

⁸ Siro nieko a vie kemesa ruosuoko chünukeshüko chüüzelie mote, derei a kemesachü nu chazoumia pethopie u bu nie sou nu mhachüte.

⁹ Niepuu Jihovae puya: Chazoumia, u nou mu u chü gei u zhürekemomia, tsiu Israel donu keba chazoumia puorei bu a kemesachü nu lelie lho.

¹⁰ Derei Leviko a kinu pecieketako Israel yotuoketa ki uko terhuorhiko siemedzi di a kinu pecieketako, süko bu siazhau pfütuo.

¹¹ Uko bu a kemesachü nu lietho chütuo, rüsuokiu careko mehotuo, sidi rüsuokiu nu mhachütuo. Ukoe kethe ruosuoko dukhrituo mu themiako la ruosuo chütuo, mu uko bu süko mhodzü tha di süko lie chütuo.

¹² Siro ukoe uko mhodzünu uko terhuorhiko lie chü mu Israel kinuko chüpie mha kesuo kechü nu letakecü la; süla a uko la rüseshüya, Niepuu Jihovae puya, ukoe uko siazhau pfütuo.

¹³ Uko a penuo vorlie lho, zievomia puo chü di a lie chülie lho, morei a ruosuo kemesako, mha kemesathoko penuo vorlie lho; derei uko ngau mu mha kerütsekecü kechü pete pfütuo.

¹⁴ Sishierei a uko pethopie uko bu rüsuokiu kemeho chütuo, süu mhatho pete, mu sünu chüketuo pete la.

Levimia Zievoko

¹⁵ Derei Levimia zievoko, Zadok yiemiako, Israel kinuko a kinu rütsi tuoketa ki a mhatho se kebako, uko a lietho chütuo üdi a penuo vortuo; sidi ukoe chüshuo mu thezie ruosuo chütuoü uko a mhodzünu thatuo, Niepuu Jihovae siya.

¹⁶ Uko sü a kehouki nu leketuoko zo, uko sü a lie chütuo üdi a mizhü gei vorketuoko zo, a lie chü mu uko a pukeshüko chüüzetuo.

¹⁷ Siro uko kinu careko nu kele ki, uko linen boulieu setuo, siro kinu careu ki mu sünu mhakechü ki chümie puorei bu u gei tuolie lho.

¹⁸ Uko linen tsüzeu pfütuo, mu u chieca nu linen boulie pekhroko setuo; rükhrutalie kevi pfhenei puorei se uko phalie lho.

¹⁹ Siro uko kitiezhau nu themiako ki pracü ki, uko lietho kechü ki boulie keseko lhewatuo, sidi süko khapie kibou kemesako nu bawatuo; sidi uko pfhenei kekreiko se lalietuo, uko uko pfhenei geinu kemesa se themiako tsüwalie kelho la.

²⁰ Uko u tsü thielie lho morei uko tha bu the pechalie lho; ukoe uko tsü shü kemezhü pfütuo.

²¹ Zievomia puorei bu kinu lekecü ki zu krielie lho.

²² Uko samimiapfü lielie lho, morei u nupfunuo ze kevaketamia lielie lho, derei ukoe Israel seyie donu rüüphousemia morei zievomia nupfünuo sami kebamia rübei lietuo.

²³ Uko a themiako ki kemesa mu kerhu kekreikecü pu pethatuo, sidi mesa kemo mu kemesa kedipuo kekrei shikecü se uko pekietuo di u bu si kekreilietuo.

²⁴ Siro dienya parketa ki uko theca catuo mu uko süko a capiko medzi di mha pepituo. Uko a zhoko se satuo, siro a dieko a thenyi zha pethokeshüko pete la kepethadieko chüüzetuo mu uko a sabatko se kemesatuo.

²⁵ Uko kesiamia penuo vo di u thuo u perhulie lho; siüderei u puonuo morei u zuonuo, kehoupuorei, u nuonuo thepfu rei thenu rei, mu u siezedzürie morei u üpfünuo kiya kemomia la we u perhulie vi.

²⁶ Siro mesakelie sie, uko puo la zha thenie phrütuo.

²⁷ Sidi puoe kemesachüu nu kele nhie kinu zhau nu kemesachüu nu le di kephouma ruosuo khashütuo, Niepuu Jihovae siya.

²⁸ Sidi haue uko kayieu chülietuo: Ae uko kayieu zo; mu nieko Israel nu mha kevie se ketuoko puorei pie uko tsülie lho. Ae uko rüvieu zo.

²⁹ Ukoe lhacülhale ruosuo, tsiu kephouma, kejokemou ruosuoko cütuo; mu Israel nu kemesa ruosuo khakeshü pete uko yatatuo.

³⁰ Siro mhakehoupuorei puo si kerie chieshüko, tsiu nieko ruosuo puopuokecü pete nieko ruosuo kehoupuo shierei, zievoko vie chütatuo; mu nieko niekhrüda nelie kerieu pie zievoko tsütuo, theja bu nie kinu vorlieketuo la.

³¹ Zievomiae pera morei khunuo kehoupuorei theriese chüta morei khunuo bu ciechücierhakewako puorei cülie lho.