Ezekiel 4 - Angami Naga CL (Re-edited) Bible (BSI)

Jerusalem Whuokecü Rhiu

¹ Siro no rei, he-i themiau, ita puo pielie, di süu khapie n mhodzünu shülie. Siro sünunu Jerusalem nadi rhiu rhishülie;

² sidi süu perhieketuo la mhanyako chülie, süu perhieketuo la khahoulie, mu seipe chülie, süu perhieketuo la razhüchüko chülie, di süu khieümhoura thumeketuo la seideko keselie.

³ Süsie, no theginyü puo chülie di süu pie no mu nadiu nnie donu sozha chüliecie; sidi n zie bu süu petsoulie, sidi süu pie keperhieketuo thau nu balie; sidi süu neshücie. Hauha Israel kiu la zasi puo chütuo.

⁴ Siro n vitsa pezhü pfüzhülie, sidi Israel kiu pejokecüu pie süu gei zhüwalie; noe uko pejokecüu toupfüketuo la teisozhako kephrü ze di süu gei zhülie.

⁵ Kekreilamonyü ae uko pejoketuo teicieko kephrü de teisozhako pie n gei shüwate, zha krie se di hiethepfü sidi no Israel kinuko siazha toupfütuo.

⁶ Siro no hako tseita ro, no n zatsa pezhü pfü lazhülie, noe Juda kiu pejokecü zha hiedia toupfü; ae cie puo la zha puopuo icü chüshüwate.

⁷ Siro no n zie pie Jerusalem reketuotsa valie, siro n bou whe mo di no süu petsoukecü siedzekesi die putuo.

⁸ Harie, a n phawatatuo, süki noe rürei lutsahatsa valie lho, reketuo zhako tseilie kemochie si batatuo.

⁹ Siro no thoulha mu barli, rücü, lentil, tshütienuo mu nhalha selie di süko khapie mhabou puo nu shülie, sidi n thuo n la niekhrüda rieliecie. No n tseitsa nu zhüketuo zha pete, zha krie se di hiethepfü, no süu cütuo.

¹⁰ No cüketuo kecüca liro khunhie la puo mesi shekel mepfüpfütuo; puotei chiepie no süu cütuo.

¹¹ Siro no dzü mejü di krietuo, hin puo za sorou; no puotei chielie di süu krietuo.

¹² Noe süu barli pie niekhrüda kechü tuoi di cütuo, tsiu no süusü uko mhodzünu themia buo geinu rietuo.

¹³ Jihovae puya, “Hakemhie di Israelmiako a uko whuopie seyieko donu keshüra nu rhukecü niekhrüda cütuo.”

¹⁴ Sitse ae sie, “He-i, Niepuu Jihova! Ae a perhuwa mo zoluo; a nhicu nunu vor thie ketso theriese chüketa cü morei khunuoko bu cierha phaphakewa cü mo zo; morei mha kerütsekecüko bu a tie nu le mo zoluo.”

¹⁵ Sitse puoe a ki, “Co, a themia buo sou nu n bu mithu buo setuo ho, süu se di n niekhrüdako keseliecie.”

¹⁶ Süsie puo a ki, Themiau, ae Jerusalem nu kecüca bie pejüwatuo; ukoe niekhrüda mejü di mu michie siei di cütuo, tsiu ukoe mejü di dzü krietuo, tsiu u vapethopfü di krietuo.

¹⁷ Uko bu niekhrüda jüta tsiu dzü jüta; di huoniehuo ze u ziekejü chü batatuo mu u pejokecü nunu u chü pejüwatuo.