Ezekiel 2 - Angami Naga CL (Re-edited) Bible (BSI)

Leshütshü Ziemho-u

¹ Puoe sie a ki: He-i themiau, n phi gei thaliecie, sitse a n ki die pushütuo.

² Sidi puo a ki die pushü tse, ruopfü puo a nou leta, sidi a chüpie a bu thalieta, mu puo a ki die puketa a silie.

³ Puo a ki, Themiau, a n ketsepie Israelmiako, sier a perhieketa mia perhie tuoyakezha seyie puo ki shüzhie ho; uko mu uko puonuoko thie ketso rei a gei joümou tuo zo.

⁴ Ukoe kemiakokecü tsiu u nou kere seyie zo. A n ketsepie uko ki shüzhie; mu no uko ki, “Niepuu Jihovae puya,” ishülie.

⁵ Uko thuo rünyü rei rünyü morei (kekreilamonyü ukoe mia perhie tuoyakezha kiu zo), ukoe uko donu siedzekesimia puo keba silietuo.

⁶ Tsiu no, he-i themiau, uko prei hiecie, siro uko dieko rei prei hiecie, kikhahu mu zohu thuo n zekecü chü zo shierei tsiu no seba donu keba chü zo shierei, uko dieko prei hie morei uko kenguu la n ziejüta hie, ukoe mia perhie tuoyakezha kiu zo.

⁷ No uko ki a dieko pushütuo; uko thuo rünyü rei rünyü mo shierei, ukoe mia perhie tuoyakezha kiu zo.

⁸ Derei no we, themiau, a n ki kedipuo puya shiü rünyüliecie; mia perhieyakezha kiu tuoi di mia perhie hiecie; n me mekuoshülie di a pie n ketsüu cüliecie.

⁹ A mehoshü ru thedzie puo petopie a kitsa shü, mu sünu leshütshü puo tuo.

¹⁰ Puoe süu a mhodzünu kelhashü; mu süu puo mho shierei tsiu puo sietsa rei thu, siro sünu thekrü mu kekra tsiu kemezhieketuo dze thupie tuo.