Ezekiel 16 - Angami Naga CL (Re-edited) Bible (BSI)

Ukepenuopfü gei Dietho Moketapfü

¹ Siro Jihova die a ki vor di sie:

² Themiau, Jerusalem bu puo kerütsekecü siliecie.

³ Pushülie, Niepuu Jihovae Jerusalem ki puya: N sedeu siro n kepenuo chüu sü Kanan kijü nu zo; n puo sü Amormia, mu n zuo sü Hitmia.

⁴ N penuokeshü liro, n penuokelie nhie n luo rei re mo, morei n chü kemesaketuo la dzü nunu rei n khrü mo, morei metsie pie n kenhe mo, morei pfhe nunu rei n kezü mo.

⁵ Themhi puorei n ngumezhie mo, mha hakoha puorei n ngumezhieketuo la chüshü mo; derei n kelhoupie phouyo nu shüwa, n penuokelie zha nhie nu n thi zo.

⁶ A n pfüthe vo ru no n thuo n zie nunu rüzapfü zhükecü ngu. N thuo n zie nu zhükecü ki, a n ki, “Rheiliecie!

⁷ Sidi lie nu sei kemhie memie sieliecie” sishü. No memie sielie, rükrielie sidi thenumiapfü puo chülie; n nunie rüchülie, siro n tha thelie; sizorei noe methuo tsiu n kewhe tuo mo zo.

⁸ Süsie a n pfüthe la vo di n mehoshü ru noe mia ngu n neikecü teiu nu bata, süla a pfhe khoupie n wheshü, di n kemethuo wheshü: A rüse n ki shü, sidi n ze dietseidiekholie, Niepuu Jihovae siya, sidi n pie a vie chüliete.

⁹ Süsie a dzü pie n khrüwa, n geinu thezieko pete rei khrü phrewa, sidi tier pie n kenheshü.

¹⁰ Pfhe puokhu kethu pie n wheshü tsiu chüzhü pie n phikou chüshü, siro a linenpfhe pie n phashü mu pfhe kevithopfü pie n wheshü.

¹¹ A cümenyie pie n ketsoshü, tsiu a kethuo pie n dzienie nu shü, kedoukecü cü chüpie n vo nu shü,

¹² nyhükha pie n nyhü nu shü, menyie pie n nyie nu shü, tsiu keditsüre kezivi pie n tsü gei shü.

¹³ Suna mu rakachü se n rütso chüshü, tsiu linen pfhenei kemenepfü, kevithopfü, tsiu puokhu kethu se n pfhenei chüshü; noe thoulha kememhiepfü mu mepfhidzü tsiu tier cüükrie. No memie zivithor sierlie, sidi kedimiapfü chülie vita.

¹⁴ Siro n zivi la seyieko donu n dze meyie vota, kekreilamonyü a zivi süu pie n gei keshü la, Niepuu Jihovae siya.

¹⁵ Derei no n thuo n zivi peleta, sidi n zivi la no thethelieta, sidi n ki kevor pete ze pierüü chü.

¹⁶ Siro no n pfheneiko pielie, sidi n thuo n la rüsuoki kemhie kezivi se chülie, sidi süko geinu thethe lie; mha haikecü thiedzü rei chü mo morei hasie rei chü lho zo.

¹⁷ Siro a khapie n ketsü a suna rakachü pie kechü n pienyie keziviko chülie, sidi n thuo n la thepfumia miarhiko chülie, di süko ze pieü chüte.

¹⁸ Siro no khuthupfheko chüpie süko kezülie, sidi a tier mu kethengu pie uko mhodzünu shü.

¹⁹ Süsie rei a pie n ketsü niekhrüda, a pie n vakechü thoulha kememhiepfü, tier mu mepfhidzüko se noe uko mhodzünu kethengu chü di khashüwa, sidi süu chülie, Niepuu Jihovae siya.

²⁰ Siro no penuopie a ketsü n nuo thepfu tsiu thenu rei zelie, sidi no hakoha pie süko bu mezulieketuo la ruosuo chü. N rügerüzhüko n kelhuo chülie kemo mhie!

²¹ No a nuonuoko dukhriwa, sidi uko khapie ruosuo puo tuoi di süko tsüwa.

²² Siro no kerütsekecü pete nu tsiu n rügerüzhü n medzü teiki, no methuo tsiu n whelie kemo ki, mu n zie nunu no rüzha kezhü rükra mote.

²³ N rüzhü pete sie (ce, no we chülietie! Niepuu Jihovae siya).

²⁴ No zieke pete nu n thuo n la thethe ki, mu thechü kerükrie chülie;

²⁵ chabouthu kheko nu n thuo n la thechü kerükrie chülie, sidi n ziviu chüpie kerütsekecü chüwa, sidi n thuo n khapie n pfüthe kevor pete tsü, mu n rügerüzhü chü pekra miemielie.

²⁶ Siro no rügerüzhüyakezha n siezanuomia, Ijipt n ze di thethe lie, n rügerüzhü chü pekrapie a nou chü kemeyie.

²⁷ Süla a a dzie yhapie n petsou, n kecücako chü petsawa mu n khapie n ngumvümia, Filistin nuopfüko n zho rüli la mengakezhako tsüwatuo.

²⁸ No Asiriamia ze di thethe lie, kekreilamonyü n mengu chü tseilie kenjü zocü la, no süko ze thethe lie, mu tsie rei n mengu chü tseilie mo.

²⁹ No Chaldia, thelhitheü kechü kijüu ze di n rügerüzhü chü pekra miemielie, hau zorei n mengu chü tseilie mo.

³⁰ N melou kedithede thachü shi, Niepuu Jihovae siya, noe hako pete chü, thethenupfü kethepfu mhathoko;

³¹ no chabouthu pete nu n la thechü kerükrie chülie, tsiu zieke pete nu n tha kerükrie chü! Sirei noe n zha lie mvü di thethenupfü kemhie we chü mo.

³² Miakimianuo chü di thethe lie, puo nupfu sou nu thepfu kekrei ze!

³³ Mia mha khapie thethekeliemia tsüya, derei no we mha khapie n ze thethekeliemia tsü, theso pie lutsahatsa mia tsü, mia bu vor n ze thethe lie.

³⁴ Süla noe thetheliekecü thenumia kekreimia ze kekrei, miapuorei thethelienu di n meshü mo, tsiu n zha rei khrü mo, no mia zha khrü; noe mia ki krei.

³⁵ Süla, he-i thethenupfü, Jihova die rünyüliecie:

³⁶ Niepuu Jihovae puya, n khriethomia ze thethe lie di n kesuoko rushü siro n kemethuo whe moketa la, tsiu n kerütsekecü terhuorhiko pete la, mu n nuonuoko zie se süko ketsü la,

³⁷ süla a n khriethomia pete, no uko geinu n kenei ngulieyakezhako, no khrieyakezhako pete tsiu no ngumezhieyakezhako pete ze vor kengulietuo; a lutsahatsa nu uko kengulie di uko bu n ngumvütuo, n kemethuo hieshü uko bu ngutuo, sitse uko n kemethuo pete ngutuo.

³⁸ A n dienyakecücü ki n pie thenumia pieü kechümia mu thezie pekrukecümia mhie di ketsotuo, mu noupfhü nunu tsiu mia ngu urokecü geinu thezie se n gei vortuo.

³⁹ Siro a n pie uko dzie nu shüwatuo, sidi uko n thethe thako mu n thechü kerükrieko vawatuo, uko n pfhenei lhewatuo di n pienyie keziviko setatuo, sidi n bu methuo tsiu n kewhe se mo batatuo.

⁴⁰ Ukoe mia doupuo bu sier n petsoutuo, sidi uko ketsie pie n va mu u zhiechako se n rhüwatuo.

⁴¹ Ukoe mi pie n kiko thetuo mu thenumia kekra donu n dienya kecütuo; a n bu thethe lie sa motatuo mu mia zha rei khapie mia tsü salie lho.

⁴² Sidi a n gei a noupfhü khashüwatuo, tsiu a rokecüu bu n gei rüreitatuo; süze a kemekrietatuo, tsiu a nou meyie sa motatuo.

⁴³ Kekreilamonyü no n khriesarüü zhako rükra mote, derei mha hako pete pie a nou chü kemeyie, süla a n mhathoko pie n tsü gei lashütuo, Niepuu Jihovae siya. No mha kerütsekecü pete mhogei kerügekerüzhü mhatho chüwa mo üme?

⁴⁴ Harie themia dievi seyakezha pete rei n dze hau setuo, “Puo zuo tuoi, puo nuopfü rei zo,” isituo.

⁴⁵ No n zuo nuopfü zo, puo nupfu tsiu puo nuonuoko ngumecüyakezhapfü, siro noe n dzüriepfüko siezeko zo, u nupfunuoko mu u nuonuoko ngumecüyakezhapfü. N zuoe Hitmia mu n puoe Amormia.

⁴⁶ N dzüriepfü sü Samaria, puo nuopfüko ze di pesotsa baya, tsiu n siezepfü sü Sodom, puo nuopfüko ze di pekhrotsa baya.

⁴⁷ No we uko zhoko medzikecü rübei mo, mu uko mha kerütsekecüko chükecü rübei mo, puotei huoyo donu n zho pete nu uko ki rei suokuo.

⁴⁸ A rhei ketuo tuoi, Niepuu Jihovae puya, n siezepfü Sodom tsiu puo nuopfüko no mu n nuopfüko chükecü de chü mo zo.

⁴⁹ N siezepfü Sodom kephouma sü hauha: Puo mu puo nuopfüko kemiako, kecüca ketshukelhuo cükecü siro kruopie puo thela jü zo, derei kejüketsopfhümia khruohishü mo.

⁵⁰ Ukoe kerüzhata, mu a mhodzünu mha kerütsekecü chü; süla a süko ngukeshü ki süko chüwa.

⁵¹ Samaria we n kephouma tie rei chü mo, noe uko ki rei mha kerütsekecü chü krakuo, sidi no kerütsekecü chükewa pete la n siezepfü mezhükecü mhiete.

⁵² No zokecüu rei, n kethengau pfüliecie, kekreilamonyü dienya kecükecü ki n mhathoko la n siezepfü mezhükuoüte; kekreilamonyü no kephouma chükewako uko ki kerütsekuote, uko n ki rei miathokuote. Süla mengaliecie, no rei, sidi n kemengau pfüliecie; kekreilamonyü noe n siezepfü bu miathokuoketa thashüte.

⁵³ A uko bu lhou lalietuo, Sodom siro puo nuopfüko, tsiu Samaria mu puo nuopfünie bu lhou lalietuo, mu uko ze di n bu rei lhou lalietuo,

⁵⁴ n bu n ngau toupfülietuoü mu no chükewa la mengalietuo üdi, tsiu süu bu uko nou thukepeluou chülietuo.

⁵⁵ N üpfünie Sodom siro puo nuopfüko thiedzü thau nu la volietuo, Samaria siro puo nuopfüko thiedzü thau nu la volietuo, siro no mu n nuopfüko thiedzü thau nu la votatuo.

⁵⁶ N kevi teiki n siezepfü Sodom pie n tie nu diebo-u chü mo üme?

⁵⁷ N kerüzhü hielakeshü mhodzü. Tsie we no Aram nuopfüko mu puo zanuomia pete, tsiu Filistinmia nuopfüko, n khie n mhou keba n meshüyakezha pete krenyü chüte.

⁵⁸ Süla no n rügerüzhü tsiu kerütsekecü zhakhra toupfü morosuote, Jihovae siya.

Kechachie Dietseidiekho-u

⁵⁹ U zo, Niepuu Jihovae puya: No rüseu rütseyakezhau, sidi dietseidiekhokelieu varhuowa, süla a n mhatho kemhie chüpie n gei shütuo,

⁶⁰ sishierei a n khriesarüü ki n ze dietseidiekhokelieu rükrashütuo, mu a n ze kechachie dietseidiekholietuo.

⁶¹ Sitse no n zhoko rükralietuo, tsiu a n üpfünie, n dzüriepfü mu n siezepfü zelie di unie pie n nuo chükeshü ki no mengalietuo, derei süu a ze dietseidiekhokelieu geinu lho.

⁶² A n ze dietseidiekho chütuo, sitse nieko ae Jihova ücü silietuo,

⁶³ süusü n bu rükralie di theziekejü chü batatuo ücü la, mu n ngau la mhakipuorei n tie tiega lashü lho ücü la zo, no chükewa kejo pete a vawakecü ki, Niepuu Jihovae siya.