Ezekiel 12 - Angami Naga CL (Re-edited) Bible (BSI)

Juda Miadie Chü Votaketuo Pukeshü

¹ Jihova die a ki vor di sie:

² Themiau, noe mia perhieyakezha ki puo nu lhou bate, uko mhi nyi derei mha nguya mo, u nyie bu mha rünyüketuo la ba derei mhapfhe siya mo,

³ kekreilamonyü uko mia petsouyakezha kiu zo. Süla, themiau n thuo n la tataketuo mhanyako keseliecie, sidi khinhie gei uko kengu nunu ta parlie. No uko kengu kinu thechü puo nunu tuo thechü kekrei puo nu votalie. Uko thuo mia petsouyakezha kiu zo ürei uko mhalelie rei si lhomu.

⁴ No khinhie gei uko kengu kinu n vienyako, se tataketuo mhanyako se parlie, sidi thevatie miadie chü votaketuomia mhie, uko mhinguki nu tuo pratalie.

⁵ No uko kengu kinu sozha biephalie, sidi sünunu n vienyako toupfü prataliecie.

⁶ No uko mhinguki nu n bouka geinu n vienyako toupie tuo, sidi teizei geinu süu toupfütuo; kijüu ngu moketuo la n zie dzeliecie; kekreilamonyü a Israel kiu la n pie zasi puo chüshüte.

⁷ Diekhakeshü mhie di ae chülie. Khinhie geinu a vienyako, miadie chü votaketuomia vienya mhie di se parlie, siro thevatie a thuo a dzie pie sozhau duphalie; teizei geinu süu se parlie, mu uko kengu kinu a bouka geinu süu toupielie di tuota.

⁸ Siro khise Jihova die a ki vor di sie:

⁹ Themiau, Israel kiu, mia petsouyakezha kiu n ki, “No kedipuo chüya ga?” idi pu mo me?

¹⁰ Uko ki pushülie, “Niepuu Jihovae puya: Die hauha Jerusalem kedinuomia mu sünu Israel kiu pete la puya.”

¹¹ Pushülie, “A nie la zasi puo zo, a chükeshü mhie, sütuoi uko gei rei süu chüshütuo; uko miadiemia chü di ta miara votatuo.”

¹² Siro uko donu kedinuou teizei zenu puo bouka geinu puo vienya toupie tuo, sidi tuo pratuo; puoe sozha duphalietuo di sünunu süko toupie pratuo; puo mhipie kijü ngu moketuo la puo zie dzelietuo.

¹³ A a jal kelhapie puo gei shütuo, sidi a bie nunu puo malietuo; sidi a puo ze Babilon, Chaldiamia kijü nu vortatuo, sishierei puo bu süu ngulie lho; sidi sünunu siatatuo.

¹⁴ A puokhieümhou hou kebako, puo kekhruohiko siro puo rüpfhünuo pete bie kecürepie teikhrie pete nu shüwatuo; mu a zhiechau shüzou se par uko whuotuo.

¹⁵ A uko biepie seyieko donu kezakezikeshü ki mu uko bu rünako nu cüre voketa ki ukoe a Jihova zo ücü silietuo.

¹⁶ Derei a uko mia huoyo bu zhiecha nu, pekriekecü nu mu thepetheruo nu tapralietuo, uko bu uko kevoko nu seyieko donu uko mha kerütsekecü pete pushülieketuo la; sitse uko ae Jihova zo ücü silietuo.

Ketsokecü Teiu Kedishü Kelho

¹⁷ Jihova die a ki vor di sie:

¹⁸ Themiau, pekhrukhru di n niekhrüda cüliecie, mu perüsürüsa zo tsiu michie siei di n dzü krielie;

¹⁹ sidi kijüu nu themiako ki pushülie, Niepuu Jihovae puya: Jerusalem Israel kijüu nu lhou kebako ki puya: Ukoe michie di u niekhrüda cütuo mu u nousuo di u dzü krietuo, kekreilamonyü uko kijü nu keba peteko bu methuo batatuo, süusü sünu kelhoukoe mia pekakecü la.

²⁰ Themia lhou keba nadiko ratatuo mu kijüu ruozhütatuo; tsiu nieko a Jihova zo ücü silietuo.

²¹ Jihova die a ki vor di sie:

²² Themiau, Israel kijü dze mhasidie, “Teisozhako chü pechawate, mu ziemho pete mhapuorei mote” idi pukeshüu ca kedipuo ga?

²³ Süla uko ki pushülie, “Niepuu Jihovae puya: A mhasidie hau bu ba sa motatuo, tsiu uko bu Israel nu süu pie mhasidie üdi se salie lho.” Derei uko ki, teisozhako penuo bate, mu ziemho pete chü tseilietatuo.

²⁴ Kekreilamonyü Israel kiu nu ziemho kemeda morei mia sekedo di themoukecü ba salie lhote.

²⁵ Derei a Jihova thuo puketuo dieu pushütuo, sidi süu chü tseishütuo. Süu chü menuotalie lho; derei nie teiki he-i Israel kiu, a dieu pushütuo mu süu chü tseishütuo, Niepuu Jihovae siya.

²⁶ Jihova die a ki vor di sie:

²⁷ Themiau, Israel kiu hai di puya, “Puo ziemho kengu teicie kekra baluo; puoe puotei kekra tuoluokecü siedzedie puya.”

²⁸ Süla uko ki pushülie, Niepuu Jihovae puya: A dieko puorei chü menuotalie lho, derei a die pukeshüu chü tseishütuo, Niepuu Jihovae siya.