Ezekiel 11 - Angami Naga CL (Re-edited) Bible (BSI)

Kepetha Kerüzhüko Ketsokecü

¹ Siro ruopfüu a chüse sielie, di a ze Jihova kiu niathutsa careu, niathutsa petsou kebau nu vor. Sünu care kikhau kiki mia mepfüepengou ba; süko donu themiako mhokezhamia Azur nuou Jazania mu Benaia nuou Pelatia, rei keba ae ngu.

² Puo a ki, “Themiau, themia hako mha kesuo rhüyakezhamia mu mezhü kemo kepetha pie nadi hau nu khashüyakezhako,

³ uko sie, ‘Ki chüketuo tei moluo; nadi hau sü li puo zo, mu we sü themuou zo.’

⁴ Süla siedzedie pu uko petsoushülie; siedzedie pushülie, he-i themiau.”

⁵ Sitse Jihova ruopfüu a gei tsurta, mu puo a ki, “Pushülie, Jihovae puya; Nie mha hai di leya, he-i Israel kiu nie nou le kebau a si baya.

⁶ Nieko nadi hau nu mia kekra dukhriwa, sidi dukhrikewako pie chaüko tshuwate.

⁷ Süla Niepuu Jihovae puya; nieko dukhripie sünu kezhüko sü themuou zo, nadi hauha galiu zo; derei a süu nunu nieko chüse parwatuo.

⁸ Nieko zhiechau prei, mu a zhiechau se nieko gei vorshütuo, Niepuu Jihovae siya.

⁹ A sünunu nieko chüse parwatuo, sidi nieko khapie chazoumia dzie nu shüwatuo, mu ketsokecüu pie nie gei shütuo.

¹⁰ Nieko zhiecha geinu tetsutuo, mu a Israel tierie nunu nie dienya kecütuo. Sitse nieko ae Niepuu Jihova ücü silietuo.

¹¹ Nadi hau bu nie galiu chülie lho, nie bu sünu muou rei chülie lho; a Israel tierie nunu nie dienya kecütuo.

¹² Sitse nie ae Niepuu Jihova ücü silietuo, nie puo zhoko medziya mo, mu puo kepetha rei se balieya mo, derei nieko khieümhou keba seyieko zho medzi di lhoute,” sita.

¹³ Siro a siedzedie pu ketha ki, Benaia nuou Pelatia siata. Sitse a tsu zerepfü zhülie di kra peto di sie, “He-i, Niepuu Jihova! No Israel lhiepie kebako pejü lotsowatieya me?”

Ukepenuopfü Israel Phou Lashüketuo

¹⁴ Siro Jihova die a ki vor di:

¹⁵ Themiau, n siezedzürieko, n se n yiemia, tsiu miadie chü ketuo n zeko, Israel kiu pete, uko pete, Jerusalem nu kelhoumiako “Ukoe Jihova kinu pecie phite; kijü hau u bu wetuo üdi pie u tsüwate,” idi pukeshüko zo.

¹⁶ Süla pushülie, Niepuu Jihovae puya; A uko chüpie kepetse nu seyieko donu shüwata zorei, mu uko bu rünako nu cüre vota zorei, a puotei huo nu uko voketa rünako nu rei uko la kemesachü puo chü vor zo.

¹⁷ Süla pushülie; Niepuu Jihovae puya: A themiako donunu nieko ze vor kengulietuo, nieko cüre tuoketa rünako nunu nie pfhü kengulietuo, sidi a Israel kijüu pie nieko tsüshütuo.

¹⁸ Sidi uko sünu vorkelie ki, ukoe sünunu mha kesuoko pete tsiu mha kerütsekecüko pete chüwatuo.

¹⁹ Siro a uko nou chüpie puo chüshütuo, mu ruopfü kesa puo pie uko nou shütuo, siro a uko geinu thenou kekhrü tsieu chüsetatuo sidi thenou kemene chüu kha lashütuo.

²⁰ Sitse uko a zhoko medzilie tsiu a kepethadieko se balie, mu süko ze balietuo. Süsie uko a themia chütuo, mu ae uko Kepenuopfü chülietuo.

²¹ Derei themia u nou pie mha kesuoko tsiu kerütsekecütsa voketako we, a uko mhathoko chüpie uko tsügei lashütuo, Niepuu Jihovae siya:

²² Süsie cherubko u shü kelha sesieta, tsiu uko khieki bageithuoko rei satuo, mu Israel Kepenuopfü zapuzayieu uko mhogei zha.

²³ Siro Jihova zapuzayieu nadiu metsuo nu sieta, sidi vo nadi niathutsa kijüthou gei zhata.

²⁴ Sitse ruopfüu a pie sieta, sidi ziemho geinu Ukepenuopfü ruopfüu nunu a ze Chaldia nu miadie chü kebako ki vorshü. Süsie ziemho a kenguu a khawata.

²⁵ Mu miadie chü kebako ki Jihova pie a pengukeshüko pete a pushü.