Ezekiel 10 - Angami Naga CL (Re-edited) Bible (BSI)

Kepenuopfü Zayieu Jerusalem nunu Tuoketa

¹ Süsie ae mehoshü, ru cherubko tsü mhogei keba tei mhiekecü mhogei safir tuoi, kediba rhi kemhiekecü puo par.

² Siru puoe themia linenpfhe dziekecüu ki sie, “cherubko khro bageithuoko donu lecie; sidi cherubko donu mizhü ketu pie n dzie ketshu chüliecie, sidi süu kezapie nadiu mho kezashülie.” Sitse puo a mhinguki nu leta.

³ Themiau letakecü ki, cherubkoe kiu nu thezatsa tha, tsiu kimhoue kiluo metsuou tshupfü bata.

⁴ Sitse Jihova zapuzayie kechüu cherub nunu sieta, sidi kiu kimhou thuo tshupfüta, mu kiluou Jihova zapuzayie ziekruoikecüu bu tshupfhü bata.

⁵ Süki cherubko shü pfhe si kiu chazoutsa rei vota, süusü Kuokejokejü Kepenuopfü die pukeshü pfhe mhieta.

⁶ Siro puoe linenpfhe dziekecüu ki, “cherubnie donunu bageithuo geinu mi pieliecie.” Sitse puoe tuo le di bageithuo puo khieki thata.

⁷ Sitse cherubko donu cherub puoe puo dzie yhapie cherubko donu keba mi nu shü, sidi süu chülie, di pie linenpfhe kedzieu dzienie nu shü; puo süu lielie di tuota,

⁸ cherubko shü khro nu themia dzie kemhie bakecü ngu.

⁹ Siro a meho sie ru, cherubnie khieki thuo dia ba, bageithuo puoe cherub puo khiekiki idi, tsiu bageithuoko rhi-e beril kemelei tsiepfü rhi tuoi.

¹⁰ Siro uko kenguu liro uko diako rhi kemhie zo, mhathuo puoe mhathuo puo nu keba mhie zo.

¹¹ Uko melekeshü ki, ukoe uko khie diako geinu mele phre, uko melekeshü sie rürei la mo zo; derei puothuo kerieu kitsapuo va ba shi sükoe süu medzi vota.

¹² Siro uko mo pete, uko chie, tsiu uko dzie, uko shü mu uko thuo lutsahatsa themhi thuo tshupfü tuo zo, mhathuo diako zorei sükemhie zo.

¹³ Mhathuoko zokecü we, a kesi ki nu uko kiekecü “Rüwhikecü thuoko.”

¹⁴ Uko puopuokecü u zie diadia; thezie kerieu cherub zie, thezie kenieu themia zie, thezie seu losha zie mu thezie diau tsüü zie.

¹⁵ Sitse cherubko siethata. Hako Kebar rü khie nu kengu kerhei khunuoko.

¹⁶ Siro cherubko meleshü tse, bageithuoko rei uko ze mele zota; mu cherubko kijü geinu ushü lhashü mu bageithuoko rei uko khieki nu mele motaya.

¹⁷ Uko thaketa ki, kekreiko rei thataya, mu uko siethalie ro, kekreiko rei uko ze siethalieya; kekreilamonyü khunuo kerheiko ruopfü uko gei tuokecü la.

¹⁸ Sitse Jihova zapuzayie kechüu kicie nunu tuota di vo cherubko mhogei thata.

¹⁹ Siro cherubko shülhase sielie di a mhinguki nu kijü geinu khota tse bageithuoko rei uko khieki tuota. Sidi uko Jihova kiu niathutsa care ki thata; mu Israel Kepenuopfü zapuzayieu uko mhogei zhata.

²⁰ Hako khunuo kerheiko Kebar rü khieki nu a Israel Kepenuopfü khro ba di ngukecüu zo; mu ukoe cherubko ücü a si.

²¹ Mia puopuokecü u zie diadia, mu u shü diadia, mu uko shü khro themia dzie tuoikecü tuo.

²² Siro u zie-e a Kebar rü khieki nu kengu thezieko ze kemhie uko mia puopuokecü u mhodzütsa mezhü vo zo.