Ezekiel 1 - Angami Naga CL (Re-edited) Bible (BSI)

Kierbagei Ziemho-u

¹ Teicie ser cie, khrü diau nu, khrü süu nu zha pengou nhie, ae Kebar rü khieki kediemia donu bakecü ki, teiko koshü, sitse ae Ukepenuopfü ziemhoko ngu.

² Thekhrüu nu zha pengou nhie, (süusü kediu Jehoiakin-e miadie chü tuoketa cie pengouketa cie.)

³ Jihova die Kebar rü khieki Chaldiamia kijü nu keba Ezekiel zievo-u Buzi nuou ki vor; mu sünu Jihova dzie puo gei tuo.

⁴ A mehoshü ru, pesotsa nu teikhrie khriedi puo vor; kimhou kezha puo puokhieümhou ziekruoi süu whi mu miu sünu par ba tso, siro miü donu thegi meriedakecü puo ba.

⁵ Siro süu donu khunuo kerhei kemhiekecü dia par. Siro uko rhiu hakemhie; ukoe themia rhi kemhie,

⁶ siro mia puopuokecü puo zie diadia; mu mia puopuokecü puo shü diadia.

⁷ Uko phi-e mezhü, siro uko phizhüe mithunuo mou kemhie, sükoe mese kezhü kemepreikelie tuoi vavai.

⁸ Uko khie lutsahatsa uko shü diako khro themia dzie tuoikecü ba. Sidi uko zie mu uko shü chüpfü.

⁹ Uko shü vo huoniehuo nyü mu uko rürei la mo zo di mezhü vo phre; mia puopuocü tuo pedzü phrezhü hu.

¹⁰ Siro uko zie kenguu we hamhie: uko diako themia zie, thezatsa losha zie, thevitsa pedo zie tuoi, mu tsüü zie tuoi;

¹¹ uko zie-e hakemhie. Uko shüe kelhapie pesotsa va; mia puopuokecü puoshü kenienie, mu uko shükoe vo huoniehuo nyü, tsiu kenie pie u mo whe isi.

¹² Sidi mia puopuokecü u mhodzütsa mezhü vota; ruopfüu kevora, uko rei süra vo, uko voketara rürei la mo zo.

¹³ Rhei ketuo khunuoko donu miü nu mizhü tukezhü tuoi, tsiu mitu tuoi, süu khunuo kerhei diako donu kho mu ke ituo; miu ziekruoi mu miu nunu teimela par.

¹⁴ Siro rhei ketuo khunuoko ta kho mu ke teimela phriephriekecü mhie di.

¹⁵ Ae khunuo kerheiko meho ba tse, kijüu gei khunuo kerheiko khieki puo khunuo diako puo la bageithuo puopuo keba ngulie.

¹⁶ Bageithuoko mu kechü rhiko kenguu hakemhie: Uko kenguu beril tsiepfü tuoi; tsiu uko diako rhi kemhie phre, bageithuo puo bageithuo kekrei puo nu keba mhie.

¹⁷ Uko melekeshü ki, ukoe rürei la mo zo rei lutsahatsa valielie zo.

¹⁸ Puo thuo khieko rükrie mu kemerie zo; kekreilamonyü puo thuo diako lutsahatsa themhi thuo tshupfü.

¹⁹ Siro khunuo kerhei diako melekeshü ki, bageithuoko uko khieki mele vota; mu khunuo kerheiko kijü nunu sieta tse, bageithuoko rei sieta.

²⁰ Ruopfüu kevora, uko sünu vo, mu bageithuokoe uko ze sieta, khunuo kerheiko ruopfü sünu tuokecü la.

²¹ Uko meleshü tse, kekreiko rei meleta, uko thata ro, kekreiko rei thata, mu uko kijü geinu sieta ro, bageithuoko rei sa uko ze uko khieki sietaya; khunuo kerheiko ruopfü bageithuoko nu tuotacü la.

²² Siro khunuo kerheiko tsü mhogei teikhru tuoikecü ketsiethega kemelei mhie phriephrie di uko yapfü ba.

²³ Teikhru khro, uko shü kelhapie mezhütshoi, huohiehuo petsou ba, khunuo kerheiko pete rei u shü kenienie pie puo mo-u whe phre.

²⁴ Ukoe meleshü tse, ae uko shüko pfhe, dzükezha pfhe tuoi, Kerükrietho-u teikese pfhe tuoi themia kekra pfhe chüpahi kro puo pfhe tuoikecü si mu uko thata ro uko shü se kerünuo la kertaya.

²⁵ Siro uko tsü mho teikhru mho geinu mhapfhe puo par; sitse uko thata mu uko shüko pie rünyhu ketaya.

²⁶ Uko tsü mho teikhru mhogei kediba tuoicü puo ba, süu kenguu safir tsie tuoi, siro kediba tuoikecüu mhogei kebau rhi-e themia puo kemhiei.

²⁷ Puo chieca mhotsa puo rhiu, thegi kemelei mhiekecü a ngu, süu nu mi kemhiekecü thuo pete zepfü ba, tsiu puo chieca pekhrotsa, ae miü tuoikecü ngu, siro puokhieümhou pete mha kezie puo whipfü ba.

²⁸ Puokhieümhou kezieue teirü ki kimhou gei pfhesei keja tuoi. Jihova vithedze chü zokecüu kenguu hakemhie zo. A süu kenguki, a zeretsu zhüta, sitse ae mia puo die pukecü pfhe si.