Esther 9 - Angami Naga CL (Re-edited) Bible (BSI)

Judamia U Ngumvüko Pekakewa

¹ Siro khrü kerekenieu, süu Adar-u khrü, zha kerese nhie, kediu diekhakeshüu mu thezho chükeshüu chüketuo nhie Judamia ngumvükoe uko mho kuokelie pele ba, derei süu bie ketherüpie Judamia bu uko ngumvüko mho kuokelie chüta.

² Kediu Ahasurus rüna pete nu keba Judakoe uko pechütuoü kevormia gei u dzie khashütuoü uko rünako nu vo kengu ba; mu miapuorei uko perhielie kenjüta; kekreilamonyü uko kepreiu themia pete gei vorta.

³ Rüna nu kedinuoko siro mha kekhayakezhako tsiu ahngko mu kediu khro kezhako pete Judako, khruohishü; kekreilamonyü Mordekai kepreiu uko gei ba.

⁴ Mordekai kediu kinu kezhamia puo chüta; mu puo dze kemeyie rüna pete nu pu vota; Mordekaie zha miemie sietacü la.

⁵ Sidi Judamia zhiecha pie u ngumvümia pete biewa tsiu dukhri siro pekawa, mu uko ngumvüko gei chü kenyüu chüwa.

⁶ Susa seluobau nu Judakoe mia krie pengou pekawa.

⁷ Süsie Parshandatha, Dalfon, Aspatha

⁸ tsiu Poratha, Adalia, Aridatha,

⁹ mu Parmashta, Arisai, Aridai mu Vaizatha,

¹⁰ Hamedatha nuou Haman Judamia ngumvüu nuo thepfumia kerko dukhriwa; derei uko mha vakelieko we bie mo.

¹¹ Teisozha sünhie Susa seluoba nu mia kithede dukhriwa shikecü se vor kediu pesishü.

¹² Sitse kediue sie Esther kedipfü ki, “Judakoe Susa seluoba nu mia krie pengou mu Haman nuonuo thepfu kerko dukhriwate. Uko kedirüvie kekreiko nu kedipuo chüwa shi! Tsie n kechau kedipuo ga? Süu pie n tsü zotuo. Süsie rei kedipuo cha sa nyüya ga? Süu chüshü zotuo.”

¹³ Sitse Esther sie, “Mhanuü süu kediu medo liro, sodu rei Judako Susa seluoba nu kebako bu thie thezho khakeshü tuoi chü salieketuo khashücie, mu Haman nuonuo thepfu kerko pie kegoura geinu gouwacie.”

¹⁴ Süla kediu sükemhie chülienu di diekhashüwa, Susa nu thezho-u khashüwa, mu Haman nuonuo thepfu kerko gouwa.

¹⁵ Judamia Susa nu kebako Adar-u khrü zha keredia nhie vo kengulie di uko Susa nu mia krie se dukhriwa; derei uko mha vakelieko we bie mo.

Purim Nyiu

¹⁶ Siro kediu rüna nu keba Juda kekreiko rei uko kerheiro kelalieketuo la vo kengulie, mu u ngumvümia dzie nunu kerülei ngulie, tsiu u ngumvümia nyie hietheniepengou dukhriwa, derei ukoe mha vakelieko we bie mo.

¹⁷ Adar-u khrü zha kerese nhie mha hau chü, mu zha keredia nhie uko rüleilie di teisozha süu pie thehethehie kechü tsiu u kenei teisozha puo chü.

¹⁸ Derei Susa seluoba nu keba Judako zha kerese mu keredia nu vo kengu, siro zha kerepengou nhie rülei, sidi teisozha sünhie thehethehie chü tsiu u kenei teisozha puo chülie.

¹⁹ Süla socüsonuoko nu, dahou kejü rünako nu lhouyakezha Judako Adar-u khrü zha keredia nhie pie u kenei teisozha puo tsiu thehethehie kechü tei, siro kerüleizha chü, mu mha khapie huoniehuo tsüüzaya.

²⁰ Siro Mordekaie mha hako thushülie, sidi leshü ketsepie kediu Ahasurus rüna pete nu, kepenuora tsiu kepeciera Judamiako ki shü.

²¹ Uko bu teiciekepra Adar khrü zha keredia mu kerepengou nhie hau se uzho puo chü pebalienushü,

²² tsiu teisozha sünie Judamia ungumvümia dzie nunu thenousuo ketuo nu thenou kenei ngulie, tsiu kekra nunu kerülei ngulie; süla uko bu teisozha süko pie thehethehie chü mu mha pie huoniehuo tsüüza, siro mha methuo pie kejümia ketsü tei chülienushü.

²³ Süla Judakoe Mordekai thupie uko ketsü tuoi, uko sedekelieu chüüzetuoya zo;

²⁴ kekreilamonyü Hamedatha nuou Haman, Agagit-u, Judamia ngumvüu, Judamia pete pekawatuoü rhülie, sidi uko bie pejüwa tsiu uko pekawaketuo la Pur ükecüu, süusü dape meho.

²⁵ Derei Esther-e kediu mhodzü lerkelie ki Haman Judamia petsou di mha kesuo rhükeshüu bu puo thuo puo tsü gei ketuo, tsiu kegoura geinu puo mu puo nuonuoko gouwaketuo diekhakeshü leshü geinu thuwa.

²⁶ Süla uko teisozha hanie üse Pur zau ze di Purim üsita, sidi leshü hanu ketuo dieko pete la, mu mha hau dze uko nguwaketau la, tsiu uko gei chü vorketa la,

²⁷ Judamia u thuo u la, u nuonuo la, tsiu u ze tuoketa pete la, süu chü mota suo zo ükecü, süusü ukoe pethokeshü tuoi khawa mo di teisozha hanie medzilie, mu teiciekepra puotei ki chütuo ülie.

²⁸ Siro teisozha hanieha u nuosenuoyie siro kiünuomia pete, rüna pete, mu nadi pete nu rükra sei zoketuo, tsiu chülie morosuo üshü. Siro Purim teisozha hauha Judamia donu khawa mo, tsiu u seyie bu hau rükra mota suo zo ükecü chüwa.

²⁹ Süsie Esther kedipfü, Abihail nuopfü, mu Mordekai Judau unie-e Purim la va kenieu nu hau chü kemetei sashütuoü kekuo pete se di thushüwa.

³⁰ Mu leshüko ketsepie kediu Ahasurus kedirüvie nu keba rüna krie puo di mepfüethenieko nu kezekevi mu ketho-u dieko se Judamia pete tsüwa.

³¹ Mordekai Judau mu Esther kedipfü unie khapie uko ki keshü tuoi, Purim-u teisozha chiekeshü teiki chüketuo la, siro uko bu u thuo u la tsiu u nuonuo la mevo mu thenoukemezhieketuo dze tsatie mhiei, teisozha hanie chü kemetei sashülieketuo chüshü.

³² Tsiu Esther thezho khakeshüu Purim dzeu bie kemetei sashü mu süu thupie leshüda puo nu shüwa.