Esther 8 - Angami Naga CL (Re-edited) Bible (BSI)

Judako bu u Ngumvümia Perhiekelie

¹ Teisozha sünhie kediu Ahasurus-e Haman Judamia ngumvüu, ki pie Esther kedipfü tsüwa. Mu Mordekaie kediu mhodzünu vor; Esther-e unie kedipuo mhie di kepero shikecü pushüwaketa la.

² Sitse kediue Haman dziekha chülie di pie Mordekai tsüwa. Tsiu Esther-e Mordekai chüpie puo bu Haman ki kemeho-u chüwa.

³ Süsie rei Esther-e kediu ki mha pu la, mu puoe tetsu puo phi nu zhülie, sidi Haman Agagit-e mha kesuo kechü tsiu puo Judamia gei mha rhükeshüu bie kediwanu kra di puo mezhiemelota.

⁴ Sitse kediue suna theu yhapie Esther tsü.

⁵ Süla Esther sielie, di kediu mhodzü thalie, sidi sie, “Mhanuü süu kediu medotuo üliro, mu a puo mhodzü puo nei chülie üro, mu mha hau kediu mhodzü puotou üro, tsiu süu puo mhiki puo medo üliro, leshü thupie Hamedatha nuou Haman Agagit-e kediu rüna peteko nu keba Judako pekawatuo üdi leshüthukeshüko bie kediwacie.

⁶ Kekreilamonyü a kedipuo kemhie di mha kesuo a themia gei kevor hielie ta? Morei a kedipuo mhie di a seyiemia pekakeshü meholie ta?”

⁷ Sitse kediu Ahasurus-e kedipfü Esther mu Mordekai Judau unie ki, “Harie, a Haman kiu pie Esther tsüwate ho, tsiu ukoe kegoura geinu puo gouwate, kekreilamonyü puoe puo dzie pie Judamia gei keshü la.

⁸ Nnie kediu za nunu, süu kediu dziekha pie zasi vülie di Judamia la nnie neiu thushüliecie; kekreilamonyü kediu za nunu mhathukeshüu kediu dziekha puo zasi vükeshü leshüu, miapuorei bie kediwalie kenjü zocü la.”

⁹ Süki khrü seu khrü, süu Sivan-u khrü, zha mepfüese nhie, kediu khro kethumiako kielie di Mordekaie diekhakeshü pete thupie India nunu vo Ethiopia ketso kijükouü nu Judako ki mu kediu khrorüko, ahngko mu kezhako ki shü, kijü kou krie puo di mepfüethenie, kijükouü nu uko leshükhuu nu mu uko die nunu, siro Judako leshükhuu nu tsiu uko die nunu idi kha phreshü.

¹⁰ Leshüu kediu Ahasurus za nunu thushü mu süu kediu dziekha pie zasi vüwa, di kediu liethomia seyakezha kier kerürhüpfü chie gei ketuoko geinu leshüko ketseshüwa.

¹¹ Süki ze kediue Judamia nadi shüüko nu ketuo kheko bu vo kengulie sidi u thuo u kerheiro kelalie, siro u nuonuoko, mu thenupfümiako pekawatuoü kezhü chüpahi kehoupuorei pekawa, dukhri, mu bie pejüwanushü, siro uko ngumvümia vie pekakelieko lielie kevi chüshü.

¹² Kediu Ahasurus rüna pete nu, teisozha puo se di silie keviu, süu khrü kerekenieu nu zha kerese nhie, Adar-u khrü.

¹³ Diekhakeshü leshüu pie rüna puopuokecü nu keshüu pie themia pete pesishüwa, mu Judako bu u ngumvümia gei u khepu lieketuo la teisozha sünhie la dojüse balie morosuo üshüwa.

¹⁴ Süla kediue lietho nu kese kier kerürhüko chiegeiketuokoe leshüko se tuoshü, kediu rhükeshü die medzi di uko rükri se vota, mu khakeshü thezhoko pie Susa seluoba nu pesishüwa.

¹⁵ Süsie Mordekaie kedi pfhenei keloshükecü tsiu kekra selie, mu suna keditsüre kezha puo selie, tsiu linen pfhe kevithopfü tsiu kemeriepfü selie, sidi kediu mhodzü nunu tuo prata siro Susa nadiu u nei mu u noumvü pie mhapuochü bata.

¹⁶ Judakoe kezie, u kenei mu thenou kemvü siro therhupfülie.

¹⁷ Tsiu kediu diekhakeshü siro thezho chükeshü rüna mu nadi kehoupuo nu rei kevora, süra Judako u nei mu unoumvü tsiu thehe chü, mu kerülei tei balie. Süsie rei süra nu themia kekra u thuo Judamia ü puta, Judamia kepreiu u gei vorketa la.