Esther 7 - Angami Naga CL (Re-edited) Bible (BSI)

Haman Goukewa

¹ Sidi kediu mu Haman unie Esther kedipfü ze thehe nu vo.

² Mu zha kenie nhie, ukoe khubezu krie keba ki, kediue sie Esther ki, “Kedipfü Esther, no kedipuo chaya ga? Süu pie n tsü zotuo; tsiu no kedipuo lie nyüya ga? Süu chüshü zotuo, kedibau ketoupuo rei khashü zotuo.”

³ Sitse Esther kedipfüe puo die kela di sie, “He-i kediu, a n mhodzüki n nei chülie üliro, tsiu süu kediue puo medoü liro, a kemenguu siro a kechau sü a kerheiro mu a themiako kelakeshüuwe.

⁴ Kekreilamonyü hieko zewate, tsiu a mu a themia pekawatuoü, mu pejüwatuo üdi. Hie ze pie miadiemia tsiu miadiemiapfü chütuo ücü sie we a kemekrie bata zotuo; derei ngumvümia puorei keka hau pie kediu sulie kenjü.”

⁵ Siru kediu Ahasurus-e sie Esther kedipfü ki, “Sükemhie chütuoü kebau, supuo ga, mu kirapuo ba ga?”

⁶ Sitse Esther sie, “Hieko kepetsouu mu ngumvüu sü Haman, themia kerüzhüu.” Sitse Haman-e kediu mu kedipfü unie mhodzünu michie phita.

⁷ Sitse kediue thehe nunu puo nou rüdata di tuo tezie nu vota; derei Haman-e Esther kedipfü ki puo kerheiro la puo mezhiemelo bata, kekreilamonyü kediue puo biewatuoü baketa puoe ngukecü la.

⁸ Kediu tezieu nunu la thehe kiu nu vor, süki Haman-e Esther keba zhü gei tetsu zhü, ru kediue sie, “Puoe a ki nu, a mhodzü nunu kedipfü rei bie kethengawatieya me?” Kediu die pu thewa tse, uko Haman zie dzewa.

⁹ Sitse Harbona, kediu dieliekechüko mia puo, iunuk-e sie, “Harie, Haman-e Mordekai, puo die la kediu kelakeshüu, gouwatuo üdi kegoura thu hiepengou chüpie kebau Haman ki nu tha, puo rükrie thu hiepengou.”

¹⁰ Sitse kediue sie, “Sügeinu puo gouwacie.” Süla uko Haman-e Mordekai la chüpie keba kegourau geinu puo gouwa. Süsie kediu nouyie menelie.