Esther 6 - Angami Naga CL (Re-edited) Bible (BSI)

Kediue Mordekai Rhukeshü

¹ Süzhü kediu zelie kenjüta, süla puoe thedze leshüdako se vorlienushü, sidi kediu mhodzü süko phrüshü.

² Mu sünu Bigthana mu Teresh kediu khro kezhamia kenie, kikha pfheyakezhanie, kediu Ahasurus dukhriwaketuo rhükecü dze Mordekaie pukeshü thupie ketuo ngulie.

³ Sitse kediue sie, “Mha hau la therhu mhatho morei mha kevi kikecüpuo chüpie Mordekai tsüshü ga?” Siru kediu kituomia puoe sie, “Mhapuorei chüpie puo tsüshü molie.”

⁴ Sitse kediue sie, “Supuonie kediu ki nu ba ga?” Hateiki Haman-e Mordekai la kegoura puo chüpie kebau geinu puo gouwaketuo la, kediu ki putuoü kediu kifükhro vor.

⁵ Siru kediu kituoko sie puo ki, “Harie, Haman-e kifükhro thalie.” Sitse kediue sie, “Puo bu lerliecie.”

⁶ Sitse Haman lerlie, mu kediue puo ki, “Kediu mia puo rhushü nyü liro kedipuo chüshü ro vi ta?” Süki Haman-e puo thuo puo rüchü di sie, “Kediu mia puo rhushü nyü bakecüu sü a mo di supuo ta?”

⁷ Süla Haman sie kediu ki, “Kediu mia puo rhushü nyü kebau la,

⁸ kediu seyakezha kedi pfhenei siro kediu bayakezha kier-u, mu keditsüre puo tsügei shüyakezhau se vorliecie.

⁹ Sidi kedipfheneiu tsiu kier-u pie kediu kedinuonuo therhutho-u dzie nu shülie, sidi puo bu kediue puo rhushü kenyü themiau ketsoshülie, sidi puo bu kier chie geinu rüna nadiu pfüthe volie mu puo mhodzü hau pu shie di; ‘Kediu themia rhushü kenyümia gei hamhiekecü chüpie puo gei shütuo ho,’ isicü putuo.”

¹⁰ Sitse kediue Haman ki, “Rükri vo di kedipfheneiu mu kier-u selie sidi n kepu tuoi, süu chüpie Mordekai Judau, kediu care ki bayakezhau gei shüliecie. No pukeshüko puorei chü mota hie.”

¹¹ Süla Haman-e kedipfheneiu tsiu kier-u selie, sidi pie Mordekai ketsoshü, mu kier geinu puo ze rüna nadiu pfüthe vo di puo mhodzü nunu sie, “Kediu mia puo rhushü kenyümia gei hakemhie chüpie puo gei shütuo ho,” si vota.

¹² Süsie Mordekai la kediu care nu vorta. Derei Haman-e kra chakhrie puo tsü dzelie di rükri puo ki nu vota.

¹³ Haman-e puo kimia Zeresh ki tsiu puo zemia pete ki, puo gei mhachüketa pushü. Sitse puo themia mhakesiko mu puo kimia Zeresh sie, “No puo mhodzü tetsutakezhüu, Mordekaie Judamia liro, no puo mho kuolie lho zo, derei puo mhodzü tetsuta tou zotuo.”

¹⁴ Mu uko puo ze kerüchü baluokecü nu, kediu liethokoe Haman ze Esther kesepie keba theheu nu puo ze votuoü vorta.