Esther 5 - Angami Naga CL (Re-edited) Bible (BSI)

Esther Kecha

¹ Zha se nhie, Esther-e puo kedi pfhenei selie di kediu kinu kibou kesouu nu lelie, di kediu bou kepetsou nu thalie; mu kediue puo kedibau gei ba, kiu care meze nu ba.

² Kediue Esther kedipfü kiluozhau nu ketha ngushü tse, puo ngu puo neilie, sidi kediu puo suna the puo dzie nu kebau yhapie Esther tsüshü, süla Esther-e phi di ketheu tie nyüshü.

³ Sitse kediu puo ki, “Kiü ga? Kedipfü Esther! N kechau kedipuo ga? A kedirüvie ketoupuo zorei pie n tsütuo”

⁴ Siru Esther sie, “Mhanuü süu kediu medo üliro, kediu mu Haman unie bu thie a kediu la kesepie keba thehe nu vorcie.”

⁵ Sitse kediu sie, “Haman ze rükri vorlie, hienie bu Esther kemengu chülieketuo la.” Sidi kediu mu Haman unie Esther kesepie keba theheu nu vor.

⁶ Tsiu khubezu se thehe chü keba ki kediue sie Esther ki, “No kedipuo chaya ga? Süu chüpie n tsü zotuo; tsie no kedipuo lie nyüya ga? Kedibau ketoupuo zo shierei chüshü zotuo.”

⁷ Sitse Esther sie, “A kechau siro a lie kenyüu liro,

⁸ mu kediu a kechau khashü tsiu lie kenyüu chükeshü puo medoü liro, kediu mu Haman unie bu a sodu nnie la thehe kesepie kebau nu vorcie, sitse a sodu kediu kepu kemhie chüshütuo.”

Mordekai la Kegoura Puo Chükelie

⁹ Sitse sünhie Haman puo nei siei mu puo noumvü phi di tuota; derei Haman-e kediu care nu Mordekai puo mhodzünu sietha rei mo, morei mele rei shü kemo ngu tse, Mordekai gei puo nei mopie mhapuochüta.

¹⁰ Sishierei Haman-e puo kethelie di kinu vorta; sitse puoe mia ketsepie puo zeko mu puo kimia Zeresh kielie.

¹¹ Mu Haman uko ki puo kinyi vi thedzechü zokecü, siro puo nuonuo kekra keba dze, tsiu kediu puo chü pezhakeshü dze pete, mu kedipuo mhie di puoe kedinuoko tsiu kediu kituoko mho puo bu zhasiete shikecü pushü.

¹² Süsie rei Haman pu sacü, “Esther kedipfüe a zo kemosie mia puo bu rei puoe kesepie keba thehe nu kediu ze vo mo zo; siro sodu rei sa puoe a mu kediu hienie kie bate.

¹³ Derei Mordekai kediu care ki kebau, a ngukecü ki mha kevi hako a la mhapuorei motaya.”

¹⁴ Sitse puo kimia Zeresh tsiu puo zeko pete sie puo ki, “Kegoura thu hiepengou rükriekecü puo chüliecie, mu sodu sügeinu Mordekai gouwanu di kediu ki puliecie; sidi no n nei siei di kediu ze theheu nu voliecie.” Sitse Haman-e mha süu puo neilie, sidi puoe kegourau chülie.