Esther 4 - Angami Naga CL (Re-edited) Bible (BSI)

Esther-e Judako Kelaketuo Puo Medoketa

¹ Mordekaie mhachüketa pete silie tse, puoe puo pfhe cierha di gakhropfhe dzie mu mige se puo kenhelie di krakhoui tuota.

² Puoe kediu care mhodzüki vor thalie, kekreilamonyü miapuorei gakhropfhe dzie di kediu care nu lelie kenjü.

³ Tsiu rüna kehourapuo shierei, kediu diekhakeshü mu thezho chükeshüu kevora, Judako unou suo phi di mevo, kra tsiu thekrü chüta; mu themia kekra gakhropfhe dzie tsiu mige se u kenhepfü bata.

⁴ Esther kituopfüko siro puo khro kezhako vor di puo ki süu dze pushü tse, kedipfüe puo nousuo phita, sidi puoe pfhemenei ketsepie Mordekai tsü, mu puo gei gakhropfheu lhewa nu shü, derei puoe süko lie mvüta.

⁵ Sitse Esther-e Hathak, kediu khro kezhamia puo, puo pfheyakezhau kieshü, di Mordekaie kedipuo chüte shi, puocapuola silieketuo la puo ketseshü.

⁶ Süla Hathak-e nadi zie nu, kediu care mhodzünu Mordekai ki vor.

⁷ Sitse Mordekaie puo gei mha kedipuopuo chüte shicü, siro Haman-e Judamia pekawa ro raka kedithede pie kediu kinyibou nu khashütuo ükecü diekhashüwa shicü dze pete pushü.

⁸ Siro Mordekaie Susa nunu uko pekawatuo üdi thezho khakeshü leshüu pie Esther pekieshünu di khashü, tsiu puo bu kediu ki le puo mezhiemelo mu puo mhodzünu puo themia kerheiro la puo ki chalienukecü pushü,

⁹ sitse Hathak vor Esther ki Mordekai die pete pushü.

¹⁰ Süsie Esther rei Hathak ki pu di dielie ketsepie Mordekai ki shü di sie,

¹¹ “Kediu kituo pete siro kediu rüna nu themia pete si ba, süusü themia kehoupuorei, thepfumia rei thenumia rei puo kie kemonu kediu kibou kesouu nu le ro, puo bu siataketuo puo thezho puo ba, kediu puo suna theu yhapie puo ketsüu rübei rheilieyakezha zo mu teisozha ser ketso rei a bu kediu ki lenu a kieshü mo zote.”

¹² Sidi ukoe Esther dieko pie Mordekai ki pu.

¹³ Sitse Mordekai uko ki Estherpfü die kela di sie, “Judamia pete mhie mo di no n thuo kediu ki nunu talietuo ükecü le hiecie.

¹⁴ Mhanuü no tsie kemekrie bata ro, thechü kekreira nu Judamia pesiekeshü tsiu kelakelie siertuo; derei no mu n puonuo kikruko pekawatuo. Mu puotei haikecü ki puo la n bu kedibau gei ba rei si mo?”

¹⁵ Sitse Esther Mordekai die kela di uko ki,

¹⁶ “Vo Susa nu Judamia ngukelie pete kie kengulie di a la mevocie, mu zha se, teizei rei teiso rei mhacümhakrie hie; a rei tsiu a kituopfüko rei sükemhie di mevotuo; sidi a kediu mhodzünu letuo, süu thezho mo; mu mhanuü a kata ro kata zemu.”

¹⁷ Süsie Mordekai vo di Esther-e puo bu kedipuo chünu shikecü pete chülie.