Esther 3 - Angami Naga CL (Re-edited) Bible (BSI)

Haman-e Judamia Pekaketuo Rhükelie

¹ Mha hako sie, kediu Ahasurus-e Haman Agagitmia Hamedatha nuou chü kerükrieshü, sidi puo bu zhalie, mu puo ba chüpie puo ze keba kedinuonuo peteko mho shü.

² Sidi kediu care nu keba kediu kituoko pete nuketsu Haman keluya; kekreilamonyü kediue puogei sishülienukecü diekhakeshü la. Derei Mordekaie nuketsuya mo, morei Haman rüsuokecü chüya mo.

³ Sitse kediu care ki ketha kediu kituoko sie Mordekai ki, “No kiüdi kediu diekhakeshüu varhuoya ga?”

⁴ Sidi uko teisonhie puo ki pu zo rei puoe rünyü moketa la, ukoe Mordekai dieko la kedipuo ütie shikecü mehotuoü Haman ki pushü; puoe uko ki Judamia ükecü pukeshü la.

⁵ Siro Haman-e Mordekai nuketsu morei puo rüsuorüsu rei kemo ngu tse Haman-e puo nei mopie khubouta.

⁶ Derei puoe puo dzie pie Mordekai rübei gei keshü zo we puo mesemia mo üdi puo nou kele mota, ukoe Mordekai themia suomia shikecü thashü puo kieshü baketa la. Süla Haman-e Ahasurus kedirüvie nu keba peteko, Mordekai themia Judamia peteko pekawatuo üta.

⁷ Nisan-u khrü, thekhrü therieu nu, kediu Ahasurus kedi chükelie teicie kerekenie cie, ukoe Haman mhodzü nunu Pur chü, süusü dapekecü puo, teisozhau mu thekhrüu la pe, sitse khrü kerekenieu nu teisozha kereseu parlie, süusü Adar khrü.

⁸ Tsiu Haman-e kediu Ahasurus ki, “N kedirüvie nu rüna pete nu themia doupuo lukihaki cüre tuote, mu uko zhoe kekreimia pete zho ki krei; ukoe kediu zho rei zeya mo, süla uko bu si keba kediu kepra jü.

⁹ Mhanuü kediu medo üliro, uko pekawaketuo la ahza khashücie, mu kediu mhatho süu chüshüketuomia a rakachü nyie ker pie u dzie nu shütuo, süko pie kediu rakabou nu vorlieketuo la.”

¹⁰ Sitse kediu puo dzie nunu puo dziekha bielie di süu pie Hamedatha nuou Haman Judamia ngumvüu tsüwa.

¹¹ Tsiu kediue Haman ki, “N bu n mhodzüki vi ücüu chülieketuo la raka pie themiako sa n tsüshü ho.”

¹² Sitse thekhrü therieu nu zha kerese nhie kediue kethumiako kielie, di Haman-e thezho khakeshü peteko thupie kediu khro mia kekhayakezha kezhathoko siro rüna pete mhokezha chü keba ahngko tsiu themia kekreikecü kedinuoko tsü, rüna pete ki u die khuthu kekreikreikecü nu mu themia pete ki, u thuo u die nunu thushü. Sünu kediu Ahasurus za nunu thu mu kediu dziekha pie zasi vüwa.

¹³ Judamia phichünhicu pete, nhicunuo kecüko rei mu thenupfümia rei, khrü kerekenieu, Adar-u khrü zha kerese nhie, uko dukhriwa mu Judamia pete pejüwanu di leshüko ketsepie kediu rüna pete nu shüwata.

¹⁴ Teisozha sünhie uko bu dojü balieketuo la ahza leshüu pie rüna pete nu shü, mu themia pete pesiwanushü.

¹⁵ Kediu ahza la leshüu rükri se vota, Susa seluoba nunu dieu khashü, siro kediu mu Haman unie zu krietuoü ke balie, derei Susa nadiu bie keboushüta.