Esther 1 - Angami Naga CL (Re-edited) Bible (BSI)

¹ Mha hau Ahasurus teiki chüta, Ahasurus-e India nunu vo Ethiopia ketso, rüna krie puo di mepfüethenie mho kedi chü.

² Süteiki kediu Ahasurus-e Susa seluoba nu puo kediba gei ba.

³ Puoe dikelie cie se cie, puo kedinuoko mu puo kituoko, Persiamia tsiu Mediamia chüpahi mhokezhako, pehüko siro rüna mho ahngko la thehe puo chü, mu uko vor puo mhodzünu keba ki,

⁴ puoe teisozha kekra se, teisozha krie puo di hiethetha, puo kedi vipie thedze chükecü mu kinyi se uko pekie.

⁵ Sidi teisozha süko tseita tse, kediue Susa seluoba nu keba pete la, kezhamia rei tsiu kecümia la rei thehe puo chü, thehe süu zha thenie chü, kediu zie puozhau nunu chü.

⁶ Sünu pfhe krapouikecü, kepejo tsiu teimeziekecü pie linen tsiu pfhe krükecü gei phalie di se vo rakachü kechü puo kemetou nu tsiu marbel coko gei khe; siro yakouzhüu suna mu rakachü se chü, süko pie marbel kemetou tsiu teimeziekecü, tsiu krapouikecü, mu teimekiekecü pie khrapiekezha gei shüpie zhü.

⁷ Suna hiedouko nunu krie, tsiu mha hiedouko puo rhi kekreikrei mu kediu kenyi ki ze kedimia zu kekra khashü.

⁸ Süu kekrie ki thezho se di krie, miapuorei mia puo kemvü chü mo, kekreilamonyü kediue puo kediki nu kezhako ki u thuo u menguu rhi nunu se morokesuo puwaketa la.

⁹ Siro Vasti kedipfü rei Ahasurus kediki nu thenumia la thehe puo chü.

¹⁰ Teisozha thenie nhie, kediue khubezu krie di puo dzüle keba ki, sie puo mhodzünu puo lie chüyakezha iunukmia thenie Mehuman, Biztha, Harbona, Bigtha, Abagtha, Zethar mu Karkas uko ki diekhashü.

¹¹ Kedipfü Vasti bu puo keditsüre selie di kediu mhodzü vor puo zivi pie themiako mu kedinuoko pekieshünuta, kekreilamonyü puoe ngu zivithorcü la.

¹² Derei Vasti kedipfüe kediu puo liethoko ki diekhakeshüu ze mvüta; süla kediue puo nei mo seta, tsiu puo nou meyiepie puo nou rüdata.

¹³ Sitse kediue thezhoko silieyakezha mhakesiko rüchü di sie (kekreilamonyü kediue thezho mu kethoca dze kesimia gei sükemhie chüyakezha la.

¹⁴ Siro puo siesomia Karshena, Shethar, Admatha, Tarshish, Meres, Marsena, mu Memukan, Persia siro Media kedinuo thenieko, ukoe kediu mhodzünu baya, siro puo kediba nu therietho chü baya.)

¹⁵ “Thezho-u medzi ro, Vasti kedipfü pie kedipuo chüwa ro vituo shi, kekreilamonyü puoe kediu Ahasurus puo kituoko ki ketsekeshü dieu ze mvüte eru.”

¹⁶ Sitse Memukan-e kediu mu kedinuoko mhodzü nunu sie, “Vasti kedipfüe kediu rübei gei kekrükewa zo moü kedinuoko pete gei, tsiu kediu Ahasurus rüna nu themia pete gei kekrüwate.

¹⁷ Kekreilamonyü kedipfü mhatho hau thenumia pete rei silietuo, ‘Kediu Ahasurus kedipfü bu puo mhodzü vornu diekhashü derei puo vor mote,’ ikecü ukoe silie tse, uko mhiki uko nupfunuo ngu mecütatuo.

¹⁸ Sünhie yawinu Persia mu Mediamiapfüko kedipfü dze si tse, ukoe kediu nuonuo pete ki sümhiecü putatuo, sidi ngukemecü kratatuo mu noupfhü kere sietatuo.

¹⁹ Kediu bu puo medo liro, puo bu kediu die khashücie, mu süusü Persia siro Mediamia zho chüwa di kediwa molieketuo nu thuwacie, Vasti bu Ahasurus kediu mhodzü la vor sa motalie; tsiu kedipfü thau pie puo ki vikuokecüpfü puo tsüwalie.

²⁰ Kediu thezho chükeshüu pie puo kedirüvie rüna pete nu pesikeshü ki, (süue mha kezha puo) mianupfünuo pete rei u nupfunuo, kezha shierei kecü shierei, therhu pie tsülietuo.”

²¹ Kediu mu kedinuoko pete rei die süu u nei phreta; tsiu kediue Memukan die tuoi chüshüwa.

²² Puoe leshü thupie puo kedirüvie pete nu, rüna puopuokecü u thuo u leshükhuu geinu, u thuo u die nunu, thepfumia kehoupuorei puo kinu mha kekhakelie mese zo üwa, mu süusü themia pete die nu thushülie morosuo ükecü chüshüwata.