Efesako 6 - Angami Naga CL (Re-edited) Bible (BSI)

Nhicuko mu Miakrünuoko

¹ Nhicuko, Niepuu nunu nie krünuo die zelie, hau puotou zocü la.

² “Nie puo nie zuo rhulie” ikeshü hauha phrapie kezhü sa di diekhakeshü kerieu zo:

³ “Silie liro nie vilietuo, mu nie kijüu nu rhei chalietuo.”

⁴ Siro miapuonuoko, nie nuonuo nou va kerüda hie, sikecüumonyü Niepuu thatha mu tahitarhokecüu nu u theke se siershülie.

Miadiemia mu Niepumia

⁵ Miadiemiako, nie Khrista diezeyakezha tuoi michie mu pe zo di nie nou nie tho chü kijü nu nie niepumia die zeliecie.

⁶ Mia mhinguki rübei mia nei chülieketuo le hie, derei Khrista diemia chü di nie nou pete se Ukepenuopfü nei chüliecie.

⁷ Themia lie zomonyü Niepuu lie chü ba zocü le di nie nei siei di nie rhie chüliecie.

⁸ Miadiemia rei, kemomia rei mha kevi chükeshü khe Niepuu kinu süu ngulieketuo siliecie.

⁹ Siro niepumiako, nieko rei uko gei sükemhie chülie. Uko kechükede hie, kekreilamonyü nnie kenienie rei teigei keba Niepu puo vie zo, mu puoe puo nei si kreiya mo.

Ukepenuopfü Rünyieko

¹⁰ Thela nu, Niepuu mu puo kekuo kezha geinu metei thalie.

¹¹ Kesuou do kesuoko ze keperhie thalieketuo la Ukepenuopfü kinu ngukelie rünyie pete se phreliecie.

¹² Kekreilamonyü we chüüzie ze keperhie monyü, mha kekhayakezhako, kekuokeseko, tsiedo kezei nu ketuo kekuoko mu teikijü nu ketuo kesuo ruopfü kekuoko ze keperhieya.

¹³ Süla Ukepenuopfü rünyieko pete chü pfülie, silie ro teisozha kesuou kevor nhie nie ngumvüu ze keperhie thalie kevi chülietuo; mu se phrelie ro tha metei zolie.

¹⁴ Sidi tha zolie, ketho-u se nie chieca nu phapfülie, mu kemiatho pie merükeya chülie.

¹⁵ Tsiu kevi chükewa Dieliekeviu zaketuo pie nie phikou chü di dojülie.

¹⁶ Hako selie, di kepele zhüu chü pfülie, süu se nie terhuokesuou theütsie tu kevorko pemhewalie kevi chülietuo.

¹⁷ Kelakelie tsüreu pfülie, siro Ruopfü zhiechau pielie, süu Ukepenuopfü dieu.

¹⁸ Siro kehoukipuorei Ruopfüu nunu nie mezhiemelo mu cha balie. Sidi kemesako pete la nie terüchü mu khawa mo di cha balie.

¹⁹ A la rei cha bacie, sidi a bu Ukepenuopfü dielie pie a tsü di a bu die pu kesie ki thepfu di keviepieketuo dieliekevi kesouu pushülieketuo la,

²⁰ a tsie süu dieliemia puo chü di thegiro se a phapfü tuo. A bu thepfu di dieliekevi pu kezhüu pushüketuo la, a la cha bacie.

Kelukeshü

²¹ Siro nieko bu a rüliko, a kedipuo mhie ba shi mu kedipuo chü ba shicü, Tukika thuo mha pete nieko ki pushütuo. Puo Niepuu nu a siezeu mu dietho di lietho chüyakezha puo.

²² A puo ketsekeshü, puo bu hie dzeko pushü di nie bu silie mu nieko chü kethepfushüketuo kele la zo.

²³ Ukepenuopfü u Puou mu Niepuu Jisu Khrista bu nouneu mu kepele geinu kekhrie sa pie u kezeko pete tsücie.

²⁴ Ngukemezhie bu jütaya kemo kekhrie pie u Niepu Jisu Khrista khrieyakezha peteko ze tuokelieu chücie.