Efesako 5 - Angami Naga CL (Re-edited) Bible (BSI)

¹ Niekoe nuokhrienuo chüketa tuoi, Ukepenuopfü dorie lieliecie,

² Khrista u khrie di u la puo phou khapie kethengu thekeshü chü di ruosuo chüpie Ukepenuopfü tsükeshü tuoi nieko rei kekhrie nu lhouliecie.

Kezie nu Lhoulie

³ Derei pierüü mu mesa kemo neiüko, siro kemehou hako nieko donu kepu rei zhü mo, kemesamia we si zhü mo zo.

⁴ Morei nieko menga kemo, mha va perhukecü, morei kethedakecü dieko kepu zhü mo zo, sikecüumonyü ketheziekecü se di lhoulie.

⁵ Nie hau si touliecie, pieüpieramia, mesa kemomia morei mha kemehoumia, (süu terhuorhi kerüsuo) Khrista mu Ukepenuopfü kedi nu u ya jü zo.

⁶ Kehoupuorei bu kemethuokemeruo dieko se nieko sewa hie. Sükemhieko la Ukepenuopfü noupfhü mia die zeya kemo nuonuoko gei vorya.

⁷ Süla sükemhieko ze mhapuorei chü hie.

⁸ Nieko thiedzü we zei ru, tsie we nie Niepuu la ziete. Kezieu nuonuoko chü di lhoulie,

⁹ kekreilamonyü kevi mu kemezhü tsiu ketho pete nu kezieu si ngulieyacü la.

¹⁰ Niepuu neiko pfhülie.

¹¹ Nieko kezeiu mhatho puo si vülieya kemoko ze mhapuorei chü hie, sikecüumonyü süko hiela se parshülie.

¹² Kekreilamonyü themia süko pekhre di chü tuoyakecüko pu rei menga zo;

¹³ derei mha pete rei kezie bu va peziekeshü ki süko ngu meyiemeluo partaya,

¹⁴ kekreilamonyü mhakehoupuorei ngu meyiemeluokelie khe sü kezie zo. Süla pukecü, “No zeyakezhau, colie! Kesia nunu sierlie, sitse Khrista n va pezieshütuo,” siya.

¹⁵ Süla nieko kimhie di lhou tuoya shiü menuoliecie. Mhasikemomia mhie mo di mhakesimia mhielie,

¹⁶ thewe kiko u rhiechülie, tsiedo ki ha vi mocü la.

¹⁷ Süla nieko melo bata hie, derei Niepuu nie bu kedipuo chü nyüya shi siliecie.

¹⁸ Zu krie di meze hie, süu u chü penyawayakezha la; derei Ruopfüu bu nie ketshu chülie,

¹⁹ nie ketshe tsali, kerüsuo tsali, mu ruopfü tsali chü huoniehuo rüchülie, nie nou nu keli mu ü chü di Niepuu tshe tuo zolie,

²⁰ u Niepuu Jisu Khrista za nunu mha pete la puotei pete nu kethezie khapie Ukepenuopfü u Puou tsülie.

Khristamia Kikru

²¹ Khrista kerhu nunu nie khapie huoniehuo khrükhro shülie.

²² Mianupfünuoko, nie khapie Niepuu ketsü tuoi nie nupfunuo khrükhro balie.

²³ Kekreilamonyü Khristae kehouu tsüu, sizomonyü puoe themo-u Kelakelieu rei chü sa, sütuoi mianupfunuo rei puo kimia tsüu zo.

²⁴ Süla kehouu puo khapie Khrista khrükhro keba tuoi, mianupfünuoko rei mha pete nu u khapie u nupfunuoko khrükhro balie.

²⁵ Mianupfunuoko, Khristae kehouu khrie di süu la puo phou khakeshü tuoi nie nupfünuoko khrieliecie,

²⁶ puo chü kemesakecü, süusü puo die pie dzü tuoi puo khrü kemesakelie,

²⁷ sidi puo thuo puo la kehouu bu zivi, rürhü morei kerhu da mo di mesa mu ciewa kelho la zo.

²⁸ Süsü tuoi, mianupfunuoko rei u nupfünuo khriepie u thuo u kekhrie mhielie zhü mu u nupfünuo khrieyakezhamia u thuo u khrieya.

²⁹ Miapuorei puo thuo puo chüüphou ngumecüya chie mo, sikecüumonyü Khristae kehouu vachü tsiu thekerorieyakezha tuoi, puo süu vachü mu thekerorieya,

³⁰ we puo mo-u gei tsüphrümia phre zokecü la.

³¹ “Hau la mia puoe puo puo mu puo zuo khawa di puo kimia ze lhoutatuo; sidi unie chü puo chütatuo.”

³² Hau die kesou se puo, mu a süu se Khrista mu kehouu dze puya.

³³ Siürei nie kehoupuorei nie nupfünuo khriepie nie thuo nie khriekezha mhielie; mu mianupfünuo kechümia rei puo thuo puo nupfunuo rhuliecie.