Efesako 4 - Angami Naga CL (Re-edited) Bible (BSI)

Khrista Mo-u gei Keze Puo Chü Keba

¹ Süla a Niepuu la kedie chü ketuou, nieko bu kielieketa phreikie sünu lhou kesü kelhou lhoulienu nie ki chaya,

² nie rünuo, mene mu shügeshühielie, tsiu nie nou cha di kekhrieu se huoniehuo gei nie nou shükhrelie,

³ Ruopfü nunu u pha kesase balieyakezha kezekeviu se keze puo chü balieketuo nie rhiechülie.

⁴ Themo puo mu Ruopfü rei puo zo, sütuoi nie kekieu rei kemerü puo rübei la nie kiekelie zo,

⁵ Niepu puo, kepele puo, dzülukepfü rei puo,

⁶ Ukepenuopfü puo, pete Puou, puo pete mho tsiu puo geinu mha pete par mu mha pete nu ketuou.

⁷ Derei Khrista mhaphruo mejükeshü de, süde ngukemezhie khashü u kehoupuorei tsü phrewate.

⁸ Süla pupie kezhü: “Puo kerükrietho gei khoketa ki miadie kechü tezete; puo mhaphruoko pie puo themiako tsü.”

⁹ (Siro pukecü, “Puo kerükrie gei khote,” idi kepu cau, puoe kijü kerünuo nu rei tsu zo imo üme?

¹⁰ Puo kerünuo nu tsuwaketau teiko mho rei khowata zo, sidi puo mha pete ketshu chülieketuo la.)

¹¹ Puo mhaphruo khapie huomia bu apostel chü, huomia bu siedzekesimia chü, huomia bu dieliekevi kepetha chü, huomia bu pastormia chü mu kepethamia chü,

¹² di kemesako kesepie lietho-u chülieketuo mu Khrista mo-u chüse sielieketuo la.

¹³ Mu si zo tha di u pete bu u kepele mu Ukepenuopfü Nuou silieketau nu rei keze puo chülie, tsiu phichülieketamia chü tseiütsokecü Khrista phichü de phichülieketuo la zo.

¹⁴ We nhicumia chü di u ketsi pesuoyakezhako kepetha die mu themia thuo pfhükelie doko bu hepie lutsahatsa vawayakezha dzü rüpfhü mhiei tuolie lhote.

¹⁵ Derei kekhrie nu ketho-u pulie, di mhakehoupuo nu rei vi kechüpie puo tsüu, Khrista kitsa va morosuote,

¹⁶ puo geinu themo puo gei zatho kekreikecü pete rei kekhepfü ba, tsiu themo peteu rei süu geinu kekuo ngulie di kekhekerhüpfü, sidi themo-u gei zatho puoe chü kezhüu chüshükelie geinu, tsiu kekhrie nunu themo peteu memie sielie mu kruolieya.

Khrista geinu Kelhou Kesa

¹⁷ Süla a Niepuu nunu pu mu pu beiyakecüu sü: Judakemoko kemethuo nouleko se tuoyakezha tuoi lhou sa tuo hie.

¹⁸ Uko nouleko chü pezeiwate; Ukepenuopfü khakeshü kelhou nu uko ya jü, kekreilamonyü uko mha lelie mo mu uko nou rete.

¹⁹ Uko kemenga si chie mo di u thuo u khapie kerüyo nu shü, mu mesa kemo neiüko kechü nu rei u kethe tuo mote.

²⁰ Nie Khrista dze kesi we sümhie mo!

²¹ Nieko puo dze silie di puo geinu pethapfü reiliete, süu kethoe Jisu gei ba.

²² Süla thiedzü nie zhorüli, themia keweu, menguko u ketsi pesuo mu u pekawakezhako rhuowalienu

²³ tsiu nie nou ruopfüu chü kesa lalie;

²⁴ sidi nie bu themia kesa, süu Ukepenuopfü rhi kemhie nunu chükelie kemiatho mu mesakecüu dzielienu pethapfüliete.

Kelhou Kesau Zhoko

²⁵ Süla tijükecü khawalie, kehoupuorei u siezanuomia ki ketho-u pu phrelie, kekreilamonyü u pete rei huoniehuo gei tsüphrü phre zo.

²⁶ Nie nouyie bu nie chüpie kephouma chüta hie, nie nei mo ba niaki pele hie,

²⁷ siro u ngumvüdo-u ba perieshü hie.

²⁸ Kerüguu bu puo rügu khawalie; sikecüumonyü puo bu mhachülie, mu puo dzie se dietho di kralie, siliro puo mha pie ketsopfhümia khruohilietuo.

²⁹ Die kesuo puorei bu nie tie nunu par hie, derei kerünyümia chü pevilieketuo die rübei pulie di pukezhü ki die kevi pu di mia bu u neiliecie.

³⁰ Ukepenuopfü Kemesa Ruopfüu the pesuo hie, süue nie rhalieketuo teisozhau la nie gei zasi vükeshüu zo.

³¹ Nieko huoniehuo gei nie nei kemo noupfhünouyie, u nei mo khuboukecü, kegeikecü, mia thakecü dieko mu nie nou nu mia ngukemecü pete khawalie.

³² Sidi huoniehuo gei tseiüvi, thenou mene mu Ukepenuopfüe Khrista geinu vapie nie tsüwaketa tuoi huoniehuo kejo va ketsülie.