Efesako 3 - Angami Naga CL (Re-edited) Bible (BSI)

Paul Judakemoko la Mhachükecü

¹ Hau la a Paul, nieko Judakemoko la Khrista Jisu diemia chü tuote.

² Süu dze nieko la Ukepenuopfü ngukemezhie lietho kha a tsüwaketa nieko rei si batuo,

³ tsiu kimhie di keviepie ketuou thapie a pesipengushü shicü, khinyhü die huoyo thushüwate,

⁴ mu nieko süko phrülie liro a Khrista dze keviepieketuo die kesou si tuoketa nieko lelietuo.

⁵ Thiedzü phouko nu we keviepieketuo die kesou hau dze pie themia ki pu mo, tsie we puo Ruopfü geinu süu pie puo apostel kemesako mu siedzekesiko pesipengukeshü tuoi:

⁶ Süu dieliekeviu geinu Judakemoko bu rei kayieu ngulie, sidi themo-u gei keze puo chülie, mu Khrista Jisue pupie kezhüu nu u ya kenyimia chülieketa zo.

⁷ Ukepenuopfü mhaphruo pie a tsü di a bu dieliekevi liethomia puo chükelie hau puo kekuo üse chüshükecü zo.

⁸ Kemesako donu kecütho-u zorei, ngukemezhie hau khapie a tsü di a bu dieliekeviu pie Judakemoko ki, si ketsolie kelho Khrista kinyiko dze punu,

⁹ mu themia pete bu mha pete chükeshüu Ukepenuopfü thiedzü teicie kekra keviepieketuo mharhü kesouu kedipuo shicü silie kevi chüshüketuo la;

¹⁰ sidi tsie teigei ketuo kezhako mu kekuoko bu kehou geinu Ukepenuopfü mhasi puo rhi kekreikecü neiüko silieketuo la.

¹¹ Puoe kechachie ketuo puo mharhü hau u Niepu Khrista Jisu geinu chüshü,

¹² puo geinu we thepfu di Ukepenuopfü ki volie vite mu puo kepele geinu thepfulie vite.

¹³ Süla a nie bu a nieko la kemezhieketuo hako lepie nie dzükouta hienuya; süko nie zayie la zo.

Paul Kecha

¹⁴ Hau la a khoutoupfü di u Puou,

¹⁵ puo kinu teigei rei kijü rei setheyie zatho khe thopfükelieu, ki cha baya.

¹⁶ Ukepenuopfü bu zayie kechü kinyiu nu puo Ruopfü kekuo khapie nieko tsü di nie nouketuo miau chü kemeteishünu chaya,

¹⁷ tsiu kepele geinu Khrista bu nie nou balie, mu nie mie bu krele kekhrie nu balieketuo la chaya.

¹⁸ Siro nieko bu kemesako pete ze we si vo tsolie kelho, puocha puozha, puo rükrie tsiu puo kesou silie kevi kekuo ngulie,

¹⁹ mu mhasi nunu si vo tsolie kelho Khrista kekhrieu silie, sidi Ukepenuopfü bu nie ketshu chülieketuo la chaya.

²⁰ Siro u nou nu mhachü tuoyakezha kekuou lanu we cha morei lelie kevi kezie phi chüshülie keviu,

²¹ puo bu kehouu nu mu Khrista Jisu geinu thephou pete gei tsiu kechachie mu kechachie zapuzayie chücie. Amen.