Efesako 2 - Angami Naga CL (Re-edited) Bible (BSI)

Kesia nunu Rheikelie

¹ Thiedzü nieko kejokemouko mu kephoumako la siatuo,

² sükisü nieko kijü hau zho se lhou, teikijü donu di tuoyakezhau medo ze, tsiedo mia die zeya kemo kekha seketuo ruopfüu dieze chü vor.

³ U pete rei va puo chüüphou menguko chü di süko donu lhou, sidi chüüphou menguko mu keleko chü, tsiu kekreimia tuoi noupfhüu u gei baketa nuonuoko chü lhou.

⁴ Derei Ukepenuopfüe ngukemezhie nyi se di puo u khriele khriethorshü zo,

⁵ sidi we thiedzü kejokemou la sia tuota zorei puo u chü perheipie Khrista saliete, sidi ngukemezhie la nieko kelaliete,

⁶ mu puoe u phoupie puo salie di Khrista Jisu nunu u bu puo ze teigei thechüko nu baliete,

⁷ sidi Khrista Jisu geinu u ngumezhiekecü puo zho vile vithorkecü pie thiesie kelhoumia kieshülieketuo la.

⁸ Siro niekoe kepele la ngukemezhie nu kelakelie zo, süusü nie kevikekuo la mo zo, süu Ukepenuopfü thuo methuo khakeshü zo,

⁹ nie mhathomhachü la rei mo, nie mia puo bu rei kemelha nyü kemo la.

¹⁰ Kekreilamonyü we sü puo mhatho kro puo zo, mha kevi chünu di Khrista Jisu nunu u chüshü zo, Ukepenuopfü u bu kelhou süu se lhou tuonu di pedzüperie kesese tuote.

Khrista nu Puo Chükelie

¹¹ Nieko thiedzü chüüphou nu Judakemomia chü di penuolie, süla thedzie üse chüüphou geinu zhürekelie la u thuo u üse zhürekelieko üyakezhako bu nie üse zhürekemoko üdi kie vorkecü leshücie,

¹² süteiki nieko Khrista sa mo di tuo, solhimia chü di Israelmia ze puo chü vor mo, tsiu phrapie kezhü dietseidiekhoko nu sikemomia chü, sidi kemerü jü mu kijü hau nu rei Ukepenuopfü sa mo di lhou vor.

¹³ Derei tsie we nieko Khrista Jisu geinu, thiedzü pecie phi tuo rei Khrista zieu la nieko ze puo penuo vorte.

¹⁴ Kekreilamonyü puoe u vitho-u zo; puo thuo puo phou pie puo kro kekrei ketuonie chüpie puo chüwa, mu u chükho kekrei seketuo sozhau, süusü u donu kengukemvüu bierhuowate.

¹⁵ Puoe thezho-u, diekhakeshüko mu ahzako pejüwate, sidi puo thuo puo geinu sünie bu kenie monyü puo chü themia kesa chüliete, di vitho-u chüshü,

¹⁶ sidi puo kengukemvü chü pejüwa di krus-u la sünie chü kesapie mo puo chüpie Ukepenuopfü ze kezevikelie chüshü.

¹⁷ Süla puoe vor nie kepetse nu ketuoko ki rei vitho-u pu mu kepenuo nu ketuoko ki rei vitho-u pushü;

¹⁸ sidi puo la u kehoupuo bu rei Ruopfü puo geinu Puou ki volie kevi chüshü.

¹⁹ Süla nie tsie we sikemomia morei solhimia mote, derei kemesako ze khenumia chü mu Ukepenuopfü kikru nu tsüphrümia chüte.

²⁰ Süu nieko apostelko mu siedzekesiko puo mvüdzepie kezhü, süu Khrista Jisu puo thuo puoke nu tsieu chükecüu geinu chüliete.

²¹ Puo geinu u ki kechü tsie kheko kere toutou vo Niepuu nunu kemesa rüsuoki puo chü sietazhie;

²² nieko rei ruopfü kitsatie keze puo chü di Ukepenuopfü bu baketuo ki puo chüliete.