Daniel 9 - Angami Naga CL (Re-edited) Bible (BSI)

Daniel Themiako la Chakecü

¹ Chaldiako rüna mho, Medemia yie puo Ahasurus nuou Darius kedi chü therie cie,

² puo dikelie therie cie, a, Daniel, teicie phrükecü leshüdau nunu, Jihova die Jeremia siedzekesiu geinu pukeshü, Jerusalem pekawatuo üdi pukeshü chü tseilieketuoe cie hiethenietuo ücü silie.

³ Süsie a rürei Niepuu Ukepenuopfü kitsa vashü, mevo mu gakhropfhe tsiu mige se a kenhepfü di a kecha kelashünu chavü.

⁴ Ae Jihova a Kepenuopfü ki a kejo phra di sie, “He-i Niepuu, zha mu u ngokecü Kepenuopfü, n khrieyakezhako tsiu n diekhakeshüko se bayakezhako gei n ketseikevi tsiu dietseidiekhokelieu se baya,

⁵ hie phoumawate mu kekrüwate, rügerüzhü tsiu n perhie tuote, n diekhakeshüko siro n zhoko therhie tuote.

⁶ Hie n kituo siedzekesiko, n za nu hie kediko, hie kedinuoko, mu hie puonuoko, tsiu kijü nu themia peteko ki pukeshüko rünyü mvüte.

⁷ “Kemiatho sü n kitsa tuo, he-i, Niepuu, derei thengau, thie ketso hie Judamia gei, Jerusalem nu kelhouko gei, mu Israel pete, kepenuo tsiu kepecie nu ketuoko, kijü nu no uko whuokewa peteko gei thenga tuote, kekreilamonyü uko kejo chü di n petsoukewa la.

⁸ He-i Jihova, hie kediko, hie kezhako, mu hie puonuoko gei thenga tuote, kekreilamonyü hie n gei phoumawate.

⁹ Ngukemezhie siro kejo vakelie sü Niepuu hie Kepenuopfü vie zo, hie puo perhie di jowatacü la,

¹⁰ mu hie Jihova hie Kepenuopfü puo kituoko gei puo zho khakeshüko zelie mote.

¹¹ “Israel pete n pfhe ze mvü di n zhoko varhuo mu rüreite. Süla Ukepenuopfü thekeu, Mosa thezho-u nu thupie ketuo kesuokerhu mu rüseu hie gei rushüte, kekreilamonyü hie n gei jowate.

¹² Puoe hie mu hie kezhako petsoukeshü puo dieko chü toushüte, hie kepeka sü zhathor zo, süusü Jerusalem petsou di chükeshü mhie tei khro kekreira chüshü chie mo.

¹³ Mosa zho nu thupie ketuo mhie mha kesuo pete hie gei vorte. Hie Jihova hie Kepenuopfü ki ngukemezhie chalie mo, hie kesuo kechüko nunu rüreilie mo mu n ketho-u leshü mo.

¹⁴ Süla Jihova mha kesuo hau meho ba di süu se hie gei vorkeshü tso. Ketho zo, Jihova hie Kepenuopfü mhachükeshü pete mezhü zo; kekreilamonyü hie puo pfhe ze mvüte.

¹⁵ “Siro tsie, he-i Jihova hie Kepenuopfü, n dzie kekuo se Ijipt kijü nunu n themiako ze parlie sidi thie ketso n za meyie ba, hie phoumawate, hie kerüzhü mhatho chüwate.

¹⁶ He-i Jihova, n kemiatho ki ze mhachüshücie, n nei kemo mu n noupfhüu bu n kemesa nadi Jerusalem, n kemesa kijüthou geinu rüreitacie; kekreilamonyü hie kephoumako siro hie puonuoko kesuo kechüko la, Jerusalem tsiu n themiako bu hie zanuomiako mhodzünu thenga chüte.

¹⁷ Süla tsie, he-i hie Kepenuopfü, n kituou kecha tsiu puo meheimelokeshü rünyüshücie, mu n thuo n lanu, Niepuu, n zie bu n kemesachü ruozhüketau gei zie lashücie.

¹⁸ N nyie kedeishüyi, he-i a Kepenuopfü sidi rünyüshücie. Mhirho pie hie ruozhüketako mu nadi n za se kebau mehoshücie. Hie hie miatho nunu n ki chaya mo, derei no mia ngumezhie phiyakezha la zo.

¹⁹ He-i Niepuu, rünyüshücie, he-i Niepuu, kejo vashücie; he-i Niepuu rünyüshücie di mhachüshücie mu menyhota hieyi! N thuo n za la, he-i a Kepenuopfü, kekreilamonyü n nadi mu n themiako n za se bayakezha la!”

Zhadoudo Hiethenieko

²⁰ Siro a mha pu, mu kecha chü, tsiu a kephouma mu Israelko kephouma phra, siro a Kepenuopfü kemesa kijüthouu sou nu a nounyüko pie Jihova a Kepenuopfü ki shü ketha ki,

²¹ sidi a kecha chü ketha ki, Gabriel themiau, a hadzü ziemho nunu puo ngukecüu, thevatie ruosuo kechü meseki ta mhai a ki vor.

²² Puo vor di a ki, “Daniel, a tsie vor di mhacamhala sikelie mu mhasi pie n tsüshütuo üzhie.

²³ No chakeshü therie nunu die puo par, süla süu se n ki pushütuo üdi a vorzhie; noe nuokhrietho puocü la. Süla dieu leshü di ziemho cau siliecie:

²⁴ “Zhadoudo hiethenieko sü n themia mu n nadi kemesau la thezho khakeshüute: Kesuo kechüko bu tseitatuoü, kephoumau bu tseitatuoü, kejokemou chü kemesatuoü, kechachie kemiatho-u se vortuoü, ziemho-u mu siedzekesiu zasi vüwatuoü, mu thechü kemesatho-u kenhelietuoü kecüute.

²⁵ Süla tsie sielie di puocapuola silie: Jerusalem chü lalieketuo mu chü piesie lalieketuo pu kepar nhie nu kenhekelie kedinuo puo kevor ketso zhadoudo thenietuo; mu zhadoudo hiesorouekenieko chaüko chü mu thekhe rei thietuo, derei kemezhiekecü tei puotuo.

²⁶ Zhadoudo hiesorouekenie sie, kenhekelieu dathewatuo mu mhapuorei ba motatuo, mu vortuoü ketuo kedinuou chüpahikoe nadiu mu kemesachüu pekawatuo. Siro puo thelau dzüdi puo vortuo, mu terhü chü di puo thela tso tuo. Pekaperuowaketuo zho-u khashüte.

²⁷ Puoe zhadoudo puo la mia kekra ze dietseidiekho kemetei puo chütuo, tsiu zhadoudo tie puo puoe ruosuo kechü khawatuo; mu süko sou nu kerütse chü zo di pekaperuowa zoketuo puo vortuo, thezho chükeshü thelau rupie mha bie kepesuou gei shü kemochie.”