Daniel 8 - Angami Naga CL (Re-edited) Bible (BSI)

Tekuochü mu Mvüdo Ziemho Kengu

¹ Belshazar dikelie cie se cie ziemho puo pie a pengushü, a Daniel, kerieu va kemhie se a pengushü.

² Siro ziemho nu a meho tha ru ae Susa seluobau nu keba a thuo a ngulie, süu Elam rüvie nu ba, mu a Ulai rü khie tha.

³ Sidi a meho sie ru tekuochü puo kerü khie ketha ngulie. Süu puo kia kenie ba. Puo kia kenienie rei cha phre, derei puoe kekreiu ki chakuo, mu kechau par nuo.

⁴ Tekuochüue thu niakratsa, pesotsa mu pekhrotsa va vokecü ae ngu. Siro khunuoko puorei puo mhodzü thakelie jüta, tsiu miapuorei kekuo süu nunu kelalie kenjüta; puoe puo thuo puo medo chüta, sidi kuo miemieta.

⁵ Sidi a meho tha tse mvüdo puo niakratsa nu kijü pete zie nyü mo zo di par. Mvüdo-u puo mhinie donu puo kia puo ba.

⁶ Sidi süu tekuochü puokia kenie kebau kerü khie tha di a ngukecüu kitsa va vor, tsiu puo zhosuo kemerie di ta puo ki vor.

⁷ Siro süu tekuochüu penuo vorkecü ae ngu. Puo zhosuo se di süu petsou vor puo thushü di puo kianie thutshewa. Tekuochüu puo mhodzünu thalieketuo puo kekuo ba mota; süla süu bu tekuochüu thukhripie kijü zhüwa sidi süu kedewa, mu miapuorei puo kekuou nunu tekuochüu kelalie kenjüta.

⁸ Sitse mvüdo-u memie zha phi sieta; derei puo kuo sesieketa ki, puo kia kezhau tseta, sidi süu sou nu teigei teikhrie diako petsou di puokia kezha dia theparta.

⁹ Siro süko puo geinu puokia kecü yopuo the par, süu memie zha phi sie pekhrotsa, niathutsa, mu kijü kezivitsa vata.

¹⁰ Süu zhasie teigei krodiko tsota. Sidi krodiko huo tsiu themvüko huo biekhrüpie kijü shüwa, sidi süko kedewa.

¹¹ Siro puo zhosuo sie di krodiko kedinuou rei peseta; süue puo geinu teisonhie kethe ruosuo chüyakezhau rei chüseta mu puo kemesachüu rei penyüwa.

¹² Rügerüzhüketa la, teisonhie kethe ruosuo kechüu sa di krodiko pie süu tsüwa; puoe ketho-u kelhoupie kijü shüwa, mu puo mhathoko nu kuo miemieta.

¹³ Sitse ae kemesa mia puo mha pu keba si, mu kemesa kekreimia puoe mha pukeshü kemesau ki pu la di, “Teisonhie ruosuo kechü, kerüzhüu mha bie pekakecü, tsiu kemesachüu khashükewa mu krodiko kedekecü ziemho-u kichiepuo si thatuo ga?”

¹⁴ Sitse puo sie, “Süu theva khisekecü nyie kenie di krie se ketsotuo; süsie ruosuobau pie puotha tou nu ba lalietuo.”

Gabriel Ziemho-u Ca Kelakeshü

¹⁵ A, Daniel, ziemho-u ngu tse, a süu cako situoü sie. Sitse mia puo a mhodzünu par thata, puo kengu themia rhi mhie,

¹⁶ sitse Ulai rüu khieki mia pfhe puo si, süu shie di, “Gabriel, themia hau khruohipie puo bu ziemho hau siliecie.”

¹⁷ Süla puoe a ketha chüu penuo vor; mu puo vor tse, a michie di zeretsuta. Derei puo a ki, “Puoca siliecie, he-i themiau, ziemho hau teisozha thelatsa lakecü siliecie.”

¹⁸ Siro puo a rüchü thaluocü nu, a kijü zerepfü di a siesi mo zhüta; sitse puo a bieshü di a bu siethalie.

¹⁹ Sitse puoe sie, “Rünyülie, thelatsa noupfhü teiu nu kedipuo chü vortie shicü a n ki pushütuo; kekreilamonyü süue pupie keba thela tei dzekecü la.

²⁰ No tekuochü puokia kenie kenguu liro, Media mu Persia nu kedinie zo.

²¹ Mvüdo-u liro Grik kediu, mu puo mhinie donu puokia kezhau liro kedi kerieu.

²² Puo kia puo tseta di puo chüu nu puokia dia the parkecüu sü kedi süu chü nunu kedi dia siertuo, derei puo kekuo delie lho.

²³ “Uko kedi thelatsa, kerüzhüko rüzhü lotsota tse, ngu preikecü mu kethedo selieyakecü kedi puo siertuo.

²⁴ Puoe kuo mu zha phi, kepeka kemeriekecü chüshütuo, tsiu puo mhachü kesieko nu chü khrielietuo. Puoe kekuoko bie pesuowatuo, mu kemesa nuonuoko pekawatuo.

²⁵ Puo kedovi di kerüzhüu bu puo dzie nunu kruo sietatuo, tsiu puo thuo puo nou nu puo le pezhatuo. Pu mo zo di puoe mia kekra pekawatuo, siro kediko mho Kediu rei petsou sietuo. Derei themia dzie se mo di puo biewatuo.

²⁶ Siro thevatie mu khise ziemho pukeshüko ketho zo. Siro no, ziemho-u pekhrepie bawalie, süu teisozha kekra sie nu chütuokecü la.”

²⁷ Süla a, Daniel, mezieta sidi teisozha huo suo bata; süsie a la sie di kediu lie chüta. Derei a ziemho-u la a dzüzei bata mu süu ca silie mota.