Daniel 7 - Angami Naga CL (Re-edited) Bible (BSI)

Nhachü Diako Kengu

¹ Babilon nu kediu Belshazar di therie cie Daniel puo tsü puo zhü gei kezhü ki puo mho puo pema mu ziemhoko ngu. Süsie puoe puo mho-u thulie:

² A, Daniel, theva geinu a ziemho puo ngu ru teigei teikhrie diako dzükezhatho-u gei rükhrie vor,

³ tsiu dzükezha nunu khunuo dia par, puoe puo ki krei.

⁴ Kerieu losha mhie mu tsüü shü chüpfü. Süsie a meho tha ru puo shünie biewa, mu kijüu geinu pie sieta, tsiu themia phi kemhie di puo phi gei thalie, mu themia kele se puo tsüshü.

⁵ Süsie khunuo kekrei puo, kenieu la par, süu ngupie thega mhie. Süu puotseitsa thalie, tsiu puo me nu puoke se puo hu donu ba mu süu sie, “Sielie di themianuo kekra mezuliecie!”

⁶ Hau sie a meho tha ru kekrei puo khurhü kemhie puo par. Khunuou pera mhie puo sietsa puoshü dia nyi mu puo tsü dia ba; tsiu mha kekhaketuo kha puo tsüshü.

⁷ Hau sie a theva gei a ziemho nu khunuo diau ngu, kemerie mu u phoumehou phi tsiu kuothor. Puo gei thegi hu kezhazhacü ba siro süko pie mha tecü mu mha tatshie phawaya, tsiu keshako puo phi pie kedewaya. Siro khunuo hau puo mhodzü ketuo khunuo kekreiko ki kreikhro zo, puo kia ker ba.

⁸ A puo kia dze le tha ru puo kia kecü kekrei yopuo uko donunu the la par; puo bu baketuo thechü la, puo kia kerie seko puobo nunu phewa. Puo kia hau gei puo themia mhi kemhiecü ba, tsiu kemelha se di die pukecü me ba.

Nnhiennhie nu Ketuou Mhodzü nunu Capi Kechü

⁹ A meho tha ru, kedibako pie thechüko nu balie, tsiu nnhiennhie nu Ketuou puo kediba nu balie, puo pfheneie krapie pekrie tuoi, mu puo tsüthae chümie kevipfü mhie; puo kedibae miü ketu chü, tsiu puothuoko rei miketu chü zo.

¹⁰ Miü rücü chü par sidi puo mhodzü nunu kru par. Mia nyienyiekecü puo lie chü, tsiu nyie kercü nyie ker puo mhodzünu tha. Mia ketsoketuo la dienya bau chülie, tsiu leshüdako lhalie.

¹¹ Siro mha kiau kemelhakecü dieko kepu la ae sie mehoshü. Sidi a meho tha tse, khunuou dukhriwa, mu puo mo-u bie pesuowa di mi nunu thewaketuo la kelhouwa.

¹² Siro khunuo kekreiko la zowe, uko mia mho dilie keviu zorei chüseta, derei uko kerheiro zowe puotei huo mu dopuo la chü pechashü.

¹³ Siro a theva gei ziemhoko meho tha tse, Themianuo rhi kemhie puo teigei kimhouko nunu par. Sidi puo nnhiennhie nu Ketuou ki vor, sidi süu mhodzünu vor thalie.

¹⁴ Siro mia mho dikecü mu zapuzayie tsiu kedi kechü pie puo tsüshü, themia peteko, seyieko, tsiu die kekreikreikecüko bu puo lie chütuo üdi. Puo mia mhodiketuoe kechachie di baketuou zo, süu jütalie lho, mu puo kedi rei pekawalie kelho puo zo.

Daniel Ziemho Ca Kelakeshü

¹⁵ A, Daniel zowe, a ruopfüe a nou nu kemezhie, tsiu a tsü nu ziemhoko a kedeta.

¹⁶ A a khieki ketha puo ki vo di mha hako dze ketho-u ketso. Süla puoe mhaca hako kelapie a pesishütuo üta:

¹⁷ “Khunuo kezha dia hako, kijü nu kedi dia sierketuoko.

¹⁸ Derei Kerükrietho-u kemesakoe kedirüvieko lielietuo sidi kechachie mu telhekechachie kedirüvieu se batatuo.”

¹⁹ Süsie a khunuo diau dze ketho-u si nyülie, süu kekreiko ki rei kreikhro, ngu prei phi, puo hu thegi üse chü mu puo dzietseko rei mese, tsiu süu mha tecülie di tatshie phawa, mu keshako puo phipie kedewa;

²⁰ tsiu puo tsü gei puo kia ker kebau, mu kekrei kepar-u tsiu süu ba la kerie seko bu tetsuta, puo kia gei puo mhi kebau mu kelhiekecü die kepu tieu tsiu kekreiko ki rei zhakuokecüu.

²¹ Siro a mehoshü tse, puo kia hau kemesako ze terhü chü sidi süko ki kuolie,

²² nnhiennhie nu Ketuou vor kemochie; sitse Kerükrietho-u kemesako gei ketsokecüu khashü, mu kemesako bu kedirüvieu pevie lalieketuo teiu vorta.

²³ Siro puo pukeshü haha: “Khunuo diau, kijü nu kedi diau tuo, süu kedi peteko ki kreikhro; süu kijü pete mezulietuo, tsiu süu kedewa, mu bietshe phawatuo.

²⁴ Puo kia kerko ca liro, kedirüvie hau nunu kedi ker siertuo, siro uko sie kekrei puo la siertuo. Haue kerieko ki rei kreikhrotuo, sidi kedi seko biekhrüwatuo.

²⁵ Puoe Kerükrietho-u petsoukecü dieko putuo, Kerükrietho-u vieketa kemesako bie pesuotuo, tsiu puotei kemesako mu thezho-u bie kediwa nyü sietuo; sidi puotei puo, puotei kenie, tsiu puotei puotie idi süko khapie puo kekuo khrükhro shüwatuo.

²⁶ Süsie dienya bau nunu capi chütuo, sidi puo mia kekhakecüu chüsetatuo, sidi puo bie pejü mu peka tseiwatuo.

²⁷ Siro kedi kechü mu mha kekhakecü tsiu tei khro kedirüvie pete khapie Kerükrietho-u mia kemesako tsüwatuo; uko kedi kechüe kechachie dikecütuo, tsiu mia kekhakecü pete uko lie chü mu uko dieze chütuo.”

²⁸ Thedzeu hai di tseite. A, Daniel zowe, a keleko a kede phi, mu a zie cacüta; derei a mha hako pie a nou balie.