Daniel 6 - Angami Naga CL (Re-edited) Bible (BSI)

Daniel Ngukemvü

¹ Darius-e kedinuoko krie puo di mepfü bu puo kedirüvie pete mho baketuo puo neita,

² mu süko mho Daniel sa di kezhamia se bu ba; kedinuoko bu mhathoko pie uko ki pushülie di kediu bu mhapuo nu rei kata molieketuo la.

³ Siro Daniel-e kezha kekreiko mu kedinuoko ki rei mhachü pevikuo zolie kekreilamonyü ruopfü kevitho puo puo gei bakecü la, mu kediue puo bu kedirüvie pete mho ba nyüta.

⁴ Süla kezhako mu kedinuokoe kedirüvie nyietsatie nu Daniel pejo nyüta. Derei ukoe kenyaketuo ca morei puo pejoketuo puorei ngulie mota. Kekreilamonyü puoe miatho zo, mu puo gei pecü mokecü morei mha kesuo chükecü puorei ngulie mo.

⁵ Sitse themiako sie, “We Daniel pejoketuo ca puorei ngulie mo, puo Kepenuopfü zho-utsa nu pfhü kemosie.”

⁶ Süla kezhako mu kedinuoko kediu ki vor di sie, “He-i kediu Darius rhei kechau chüliecie!

⁷ Kedirüvie nu kezhako, mha kekhakezhako, kedinuoko, mia tarhoyakezhako mu ahngkoe kediu zho puo sedetuoü mu mha kekhakecü puo chü kemeteituoü kedierheliete, süu themia kehoupuorei zha ser donu no zo kemosie Kepenuopfü morei themia ki kecha chü ro, he-i kediu, süu tepie loshako bou nu shüwaketuo.

⁸ Süla tsie, he-i kediu, mha kekhakecü zho-u chülie di leshüu nu zasi vüshücie, sitse süu kediwa molietuo, Medes mu Persiamia zho ki ze süu kelawa molietuo.”

⁹ Süla kediu Darius-e leshüu nu zasi vüshü di thezho-u khashüwa.

Daniel pie Loshabou nu Keshü

¹⁰ Siro Daniel-e leshüu nu zasi vüshüwaketa si zo ürei, puoe puo kiu nu vo ba zo, sünu kibou peso nu khirkiko khrüpie Jerusalem tsa va ba, sidi puoe hamhodzü chüyakezha tuoi di khunhie va se khoutoutsu Kepenuopfü ki cha mu puo thezieya.

¹¹ Siro puo kepetsouko vor Daniel-e Kepenuopfü ki cha mu ngukemezhie pfhü keba ngulie.

¹² Sitse uko kediu ki vor thezho khashüwaketau pu di, “He-i kediu! No thezho khakeshü themia kehoupuorei zha ser donu, he-i kediu, n ki zo kemosie Kepenuopfü morei themia kehoupuo ki rei cha ro puo kelhoupie loshako bou nu shüwatuo ükecü n za thushü mo me?” Sitse kediu sie, “Mha süko ketho zo, tsiu Medesmia mu Persiamia zho-u medzi di süu rhü lalie lho.”

¹³ Sitse uko kediu die kela di, “Daniel Judamia miadie chü kevorko mia puo n die rünyü ba mo, he-i kediu, morei no thezho khakeshüu rei se mhaü ba mo, derei puo khunhie va se kecha chü baya.”

¹⁴ Sitse kediu die süko sikeshü ki puo nou kemezhie seta. Sidi puo Daniel kelalieketuo leterüta, sidi niaki leta kemochie puo hie chü di puo kelatuo üta.

¹⁵ Süsie puo kepetsouko kediu ki vor di sie puo ki, “He-i kediu, Medesmia mu Persiamia zho sü, die khashükewa morei thezho puo kediu chüshüwata ro kedilieya mo zokecü siliecie.”

¹⁶ Süla kediu diekhashüwa, sidi Daniel ze vor kelhoupie loshako bou nu shüwa. Kediu Daniel ki, “N Kepenuopfü no dietho di puo lie chüyakezhau bu n kelaliecie!”

¹⁷ Siro ketsie puo se vo loshabouu tie nu khawa di kediu puo dziekha zasiu mu puo krütako zasi pie sügei zasi vüshüwa; Daniel la rhükeshüu kediwa moketuo la.

¹⁸ Süsie kediu puo kediki nu vorta, tsiu süzhü mevo zhüta; kecüca se puo ki vo mota, mu puo ze reilie mota.

Loshabou nunu Daniel Kelakelie

¹⁹ Sitse kediu khise sie zi selie di rükri loshako bou nu vor.

²⁰ Sidi puoe Daniel khapie keba loshako bouu penuo vor tse, puo noukenyü chü Daniel kie peto di, “He-i Daniel, rhei tuoyakezha Kepenuopfü kituou, no dietho di puo lie chü tuoyakezhau loshako kinu n kelalie nhie?”

²¹ Sitse Daniel sie kediu ki, “He-i kediu, rhei kechau chüliecie!

²² A Kepenuopfü puo dieliemia ketseshü di loshako me keguliete, sidi uko bu a pechüwa molie, kekreilamonyü puo mhodzünu a kejo ba kemo la; tsiu n mhodzünu rei, he-i kediu, a kekrükecü puorei chü mo.”

²³ Sitse kediu puo neithorta sidi loshabou nunu Daniel ze parlienu diekhashü. Süla loshabou nunu Daniel ze parlie, mu puo bie kerüzakecü rhi puorei tuo mo, kekreilamonyü puoe puo Kepenuopfü pele tuokecü la.

²⁴ Kediu diekhashü, sidi Daniel petsoukecüko ze vor, sidi kelhoupie loshako bou nu shüwa; uko, u nuonuoko, mu uko kimiako rei sa di. Siro uko loshabou thotsü nu ke tso kemonu loshako uko telie di uko ruko bietshe phaphawa.

²⁵ Süsie kediu Darius leshü thupie themia peteko mu kijü pete nu die kekreikreicü seyie peteko ki shü: “Kruokelieu bu nie ketshu chüliecie!

²⁶ A thezho puo chüshüya, süusü a kedirüvie nu kelhou themia pete Daniel Kepenuopfü mhodzünu michie mu pe zoliecie: Puo rhei tuoyakezha Kepenuopfücü la, kechachie baya. Puo kedi mhakipuorei katalie lho, tsiu puo mha kekhakecü puo thela jü.

²⁷ Puo shüphrakeshü mu kelakeshü, puoe tei mu kijü nie nu zasiko tsiu u ngoko chükeshüu; kekreilamonyü puoe loshako kekuo nunu Daniel kelaliete.”

²⁸ Sidi Daniel-e Darius kedi kechü ki mu Persiamia Sairos kedi teiki ketso rei vi kehie miemielie.