Daniel 5 - Angami Naga CL (Re-edited) Bible (BSI)

Belshazar Theheu

¹ Siro kediu puo krütamia mia nyie puo la thehe puo keseshü, mu puoe mia nyie puo mhodzünu zu krie ba.

² Siro Belshazar-e zu krie mezelieta tse, puo puo Nebukadnezar Jerusalem nunu chükelie suna siro rakachü khouko se vornu diekhashü, sidi kediu tsiu puo krütako, puo kimia mu puo pelipfüko bu süko nunu zu krieketuo la.

³ Süla ukoe Jerusalem nu Kepenuopfü rüsuokiu nunu chükelie suna siro rakachü khouko se vorshü, sitse kediu tsiu puo krütako, puo kimiako, mu puo pelipfüko süko nunu zu krie.

⁴ Sidi ukoe zu krie tse sie suna siro rakachü, mese, thegi, sei mu ketsie rhuoko tsheta.

Sozha gei Mha Thukeshü

⁵ Sitse kedikiu nu sozha nyhüpie keba mitubau kepetsoutsa nu themia dziekinuo par mha thuta. Siro kediue mhathu keshüu meho ba.

⁶ Sitse kediu zie ngu pesuo vorta, mu puo keleko puo kedeta. Puo bou puo doko mezieta, tsiu puo khudzanie kevü khrukhruta.

⁷ Sitse kediue melie shiekhoui di sie khrüthemvü dze kesiko, Chaldiako, mu themouko ze vornuta; siro kediu Babilon nu mhakesiko ki, “Kehoupuorei khuthu hau phrülie tsiu a ki puocau pulie liro puo bu pfhenei keloshükecü setuo, suna cü kelietuo, mu kedirüvie nu kezha seu chütuo.”

⁸ Sitse kediu themia mhakesiko pete vor, derei khuthu phrülie kenjüta morei puocau pie kediu ki pushülie lhota.

⁹ Sitse kediu Belshazar michie seta mu puo zie ngu pesuo seta tsiu puo krütako u nou meyhumezhieta.

¹⁰ Siro kedipfüe kediu mu puo niepuko kerüchü ketha sishü tse, thehe bouu nu vor. Sidi kedipfüe sie, “He-i kediu, rhei kechau chüliecie! N keleko bu n kedewa hiecie morei n zie bu zisuota hieyi.

¹¹ N kedirüvie nu mia puo kemesa rhuoko ruopfü puo nou bayakezha puo ba. N puo teikiko nu terhuoko mhasi kemhiei, puocapuola sikelie mu mha kesikele puo gei keba ngu. N puo, kediu Nebukadnezar, puo chüpie puo bu kemeduoko, khrüthemvü dze kesiko, Chaldiako, siro themouko mhokezha chüwa,

¹² kekreilamonyü ruopfü kevitho puo kesikele, tsiu u mhoca pulie kevi mhasi, dieviko ca pukelie, mu mha kereko mezamezhüshülieyakezha Daniel gei ba, kediue puoü Belteshazar üyakezhau. Süla tsie Daniel kieshücie, sitse puoe puocau pushütuo.”

Sozha gei Khuthuu Ca Pukeshü

¹³ Süsie Daniel ze kediu mhodzünu vor. Sitse kediue sie Daniel ki, “No Daniel, Judamia miadie chü kevor-u, a puo kediu Juda nunu ze kevor-u me?

¹⁴ A n dze sikecü noe terhuoko ruopfü n gei tuo, mu mhacamhala kesi, kesikele, mu terhuomia mhasi kevithopfü n gei ba üsi.

¹⁵ Siro mhakesimia, khrüthemvü dze kesimia bu a mhodzünu vor di khuthuu phrü mu puocau pu a kienushü, derei uko mha hau ca pupie a kielie kenjüte.

¹⁶ Derei a sikecü no puocau pulie vi mu mha kere hau meza toushüketuo site. Süla no mhanuü khuthu hau phrülie tsiu puocau pushülie vi üro, n bu pfhe keloshükecü dzietuo, suna cü kelietuo, mu n bu kedirüvie nu kezha seu chütuo.”

¹⁷ Sitse Daniel-e kediu mhodzü nunu puo die kela di, “No mha methuo khashütuoü kebako bu n vie chü ba zolie, morei n zhakhrau pie kekreimia tsüwalie! Sirei a khuthuu phrüpie kediu pesishütuo mu puo bu puocau silietuo.

¹⁸ He-i kediu, Kerükrietho Kepenuopfüe kedi kechü, zhakecü, zayie mu kuokecü pie n puo Nebukadnezar tsüshü.

¹⁹ Siro puoe zhakecü pie puo tsükeshü la, themia pete, seyieko, siro die kekreikreikecüko puo mhodzü michie mu pe vor. Puoe dukhri kenyüko dukhriwa, perheipie ba kenyüko perheipie ba, therhupie tsü kenyüko therhupie tsüshü, mu chü kerünuowa kenyümia chü kerünuowa.

²⁰ Derei puo nou rükrie sieta mu puo kemiako di puo nou reketa ki, kediba geinu puo khawa, tsiu puo zayieu puo geinu chüwa.

²¹ Sidi themia kro-u nunu puo whuowa, tsiu puo kele chüpie khunuo kele mhiewa. Puoe Kerükrietho Ukepenuopfüe themia kedi mho puo kekuo keba, tsiu puo kedi pie puo nouliemia tsüyakecü silie kemochie, puo bu nha gadako ze bata; tsiu teigei thezei bu krü puo va.

²² Siro no, puo nuou Belshazar, n nou rünuolie mo, no hako pete si zorei!

²³ No n thuo n chü kerükriepie teigei Niepuu mho shüwate! No rüsuokiu nu mhakhouko se n mhodzünu vor, sidi no mu n krütako, n kimiako tsiu n pelipfüko süko nunu zu krie. Noe rakachü siro suna, mese, thegi, sei tsiu ketsie rhuoko rüsuo, sükoe mha ngu morei silieya mo; derei n keha puo dzie nu keba Ukepenuopfü mu n chako pete puo vie zokecüu, no süu rhulie mote.

²⁴ “Süla puo thedzieu ketseshü di khuthu hau thushüte.

²⁵ Siro khuthu thukeshüu hamhie: MENE, MENE, TEKEL, mu PARSIN.

²⁶ Siro hauha puocaute: MENE, Ukepenuopfü n kedi zhako phrüliete mu süu se puo thela nu vorte;

²⁷ TEKEL, roshükhou nunu n mejüliete tsiu no tso mocü nguliete;

²⁸ PERES, n kedi kezawate sidi khapie Medesmia mu Persiako tsüwate.”

²⁹ Sitse Belshazar diekhashü, sidi Daniel bu pfhe keloshükecü selie, suna cü kelielienushü, sidi puo bu puo kedirüvie nu kezha seu chütatuoü pesishüwa.

³⁰ Süzhüsü mia bu Chaldiako kediu Belshazar dukhriwa.

³¹ Siro Medesmia Darius-e cie hiesorouekenie phichüketa ki kediba süu lielie.