Daniel 4 - Angami Naga CL (Re-edited) Bible (BSI)

Nebukadnezar Mho Kenieu

¹ Siro kediu Nebukadnezar-e, themia peteko, seyieko, die kekreikreicüko kijü nu lhouketuo peteko ki: Nieko bu kekruo kekrau chüliecie!

² Kerükrietho Kepenuopfüe a gei zasiko mu u ngothoko chükeshüko lepie a nei bate.

³ Puo zasiko kide zha shi, puo u ngothoko kide rei kuo shi! Puo kedi-e kechachie keba kedi, tsiu puo dikecüe thephou puo nunu vo thephou puo ketsoya.

⁴ A, Nebukadnezar, a kinu rüleitshüi mu a kediki nu kruo phi ba ru.

⁵ A mho pema mu süu a chü kemidewa; a zhü nu a nou keleko mu a tsü nu ziemhoko a bie kemideta.

⁶ Süla a diekhashü di Babilon nu mhakesimia pete ze a mhodzünu vornushü. Uko bu a mho cau pie a ki pushüketuo la.

⁷ Sitse kemeduoko, khrüthemvü dze kesiko, Chaldiako mu themouko a ki vor, mu a uko ki a mho pushü, derei ukoe puocau a ki pulie mote.

⁸ Sirei Daniel a mhodzünu vor, Belteshazar üdi a rhuou za nunu puo za thokeshüu, siro puo gei terhuo kemesako ruopfü ba mu a puo ki a mho pushü:

⁹ “He-i Belteshazar, kemeduoko kezhau, kemesa rhuoko ruopfüu n gei keba a si, mu pekhrepie keba puorei n mhata mo zo. Süla a mho pemakecü hau we; puoca a ki pushücie.

¹⁰ “A zhü geinu hauha ngu; kijü metsuo nu seibo puo ba, mu süu rükriethor zo.

¹¹ Seibo-u memie sie zha mu meteilie, puo mezüu kho tei tso ba, mu kijü kela pete süu nguta.

¹² Süu nyüko zivi, puo si kra phi, tsiu sü geinu kecüca pie mia pete tsüya. Nha nu nhachüko puo khronu teisü ngulieya, teirako süu coko gei baya, tsiu kerheiro keba khe süu geinu pevülieya.

¹³ A zhü gei, a tsü nu ziemho nunu a meho zo tha, ru rükhoumia kemesa puo teigei nu ker.

¹⁴ Puoe melie peto di sie: ‘Seibo-u wiwalie mu puo coko zawalie, puonyüko kenieriewalie mu puo siko kezawalie. Nhachüko bu puo khronu tatalie, tsiu teirako bu puo coko geinu pruotalie.

¹⁵ Derei puo mvüu mu puo mieko kijü nu khapie bawalie, thegi mu mese pie phapie balie, lie nu nha kemenera nu. Teigei thezeiu bu puo petselie, tsiu puo bu nhachüko ze kijü nu nha pie puo ya chütuo.

¹⁶ Puo nou bu themia nou geinu rüditacie. Sidi khunuo nou pie puo gei shüwacie. Sidi va thenie puo gei sishülie.

¹⁷ Mha hau rükhouko bu diekhashü, mha pepikelieu kemesako thuo thezho khakeshüu zo, süusü themia lhou tuoyakezhamia bu Kerükrietho-ue themia mho di bayakezha silieketuo la; puo süu khapie puo medomia tsüya, tsiu themia zhasethomia pie sümho bashüya.’

¹⁸ A mho hau, a Nebukadnezar kediu ngushü. Belteshazar no tsie süu ca pushücie, a kedi nu mhakesimiako pete puocau pie a ki pushülie lhoketa la. Sirei no pulie vi, kemesa rhuoko ruopfüu n nou keba la.”

Daniel Kediu Mhoca Pukeshü

¹⁹ Sitse Daniel, Belteshazar üyakezhau dopuo puo va pethowa. Puo keleko puo kedewaketa la. Sitse kediu sie, “Belteshazar, a mho-u morei puocau bu n kedewa hiecie.” Ru Belteshazar puo die kela di, “A niepuu, n mho-u bu n ngumecüyakezhamia la, mu puocau bu n ngumvümia la tacie!

²⁰ Seibo no kenguu memie tsiu zha metei sie di puo mezü kho tei thu siro kijü vala ketso ngulie vita,

²¹ puo nyüko zivi mu puo si kra phi, sidi kecüca pie mia pete tsü, puo khronu lie nu nhachüko lhou, tsiu puo coko gei teirako bu u kruchü,

²² sikecüue no zo, he-i kediu! Noe zha mu kuo philie zo. N kezhae sie tei thu, mu noe kijü vala ketso nu kedi chü.

²³ Siro kediu rükhoumia kemesa puo teigei nu keker ngu mu süu sie, ‘Seibo wiwalie tsiu pekawalie, derei puo mvüu mu puo mieko kijü geinu pie bawalie, thegi siro mese pie phawa di terha nha menekecüra pie bawalie; sidi teigei thezei bu puo petselie, sidi puo bu lie nu nhachü ze di nha puo ya ngucülie, va thenie puo gei vor kemo ki’

²⁴ puocau sü hau, he-i kediu, mu Kerükrietho-u diekhakeshü, a niepuu kediu gei kevor haute:

²⁵ Themia krotho nunu n whuowatuo, sidi n bu terha nhachüko ze batatuo. Noe thudo kemhie nhaliecü tuo, noe teigei thezeiu rülutuo, sidi va thenie n gei si vortuo, Kerükrietho-u themia pete mho di ba, tsiu puo kedi pie puo nouliemia tsüyakecü no silie kemochie situo.

²⁶ Siro seibo mvüu mu puo mieko pie bawalienu di diekhakeshü tuoi, no Teigei mha kekhase bayakecü sikelie nhie, n geinu kedi chü pesie lalietuo.

²⁷ Süla, he-i kediu, a tarhokeshü dieu lieliecie: Kemiatho pie n kephouma chü kemesaliecie, mu mia u peseyakezhako ngumezhiekeshü bu n kejokemouko khrüwaliecie, sitse no vikezhü haha ba pechalietuo.”

Nebukadnezar Chü Kerünuokewa

²⁸ Mha hako pete Kediu Nebukadnezar gei vorta.

²⁹ Khrü kerekenie sie ki puoe Babilon kediu kitsü gei tuo,

³⁰ süki kediu sie, “Babilon kemeyie haha a kemecakemekhro mu a kekuo kezha üse a nadi haha chülie mo üme?”

³¹ Sitse kediu die pu pedze thaluocü nu mhapfhe puo teigei nu ker di; “He-i kediu Nebukadnezar n la mha haha pushüte: Kedi kechü n ki nunu tuotazhie!

³² Themia krotho nunu n whuowatuo, mu n bu terha khunuoko ze batatuo. Noe Kerükrietho-u themia kedi pete mho di ba mu puoe kedi pie puo nouliemia tsüya ücü silie kemochie, n bu thudo mhie nhaliecütuo, mu va thenie n gei si vortuo.”

³³ Süsie süko pushü mumetha Nebukadnezar petsoukecü dieu chü tsei vorta. Themia krotho nunu puo whuowa, puo thudo mhie nhaliecü, mu puo moe teigei thezei rülu, mu puo tsütha chapie tsüüra mie tuoi tsiu puo dzietseko pera dzietse mhieta.

Nebukadnezar Ukepenuopfü Tshekecü

³⁴ Siro zha süko tseita tse, a Nebukadnezar, tosie teigei mehoshü, sitse a siele la vorlieta. Sidi a Kerükrietho-u tsheshü, mu puo thezieshü tsiu kechachie rhei tuoyakezhau rhushü. Kekreilamonyü puo kedi-e kechachie kedi, tsiu puo kedi-e thephou pete nu voya.

³⁵ Kijü nu lhou ketuo peteko zo we puo mhodzünu mhathopuo kemo mhie zo, tsiu teigei krodi ze di kijü nu lhouketuo pete gei puo medo kemhie chüya. Siro miapuorei puo dzie khalie lho morei sie puo ki, “No kedipuo chüya ga?” ireilie lho.

³⁶ Sükisü a siele la vorlie; siro a kedirüvie bu zapuzayie chü lalieketuo la therhu mu kruokelie a gei la vorlie. A tarhokezhako mu a niepuko a ngu lalie, sidi a kedirüvie nu a di sede lalie, tsiu a chü pezha phi sashü.

³⁷ Süla tsie a, Nebukadnezar, teigei kediu tsheshü, pu kerükrie mu rhukeshü puo mhatho pete ketho zo, puo zhoko kethocau zo, mu puoe kemiako tuoyakezhako chü kerünuowaya.