Daniel 3 - Angami Naga CL (Re-edited) Bible (BSI)

Suna Miarhiu

¹ Kediu Nebukadnezar-e suna miarhi puo chülie, puo rükrie thu hiesorou, mu puozha thu sorou; sidi puo süu pie Babilon kedirüvie nu keba Dura razha nu doupie tha.

² Süsie kediu Nebukadnezar mia ketsepie kedinuoko, kezhako, ahngko, mia tahitarhoyakezhako, kinyikeseko, kethoca cayakecüko, capimiako mu kedirüvie nu kezhako pete ki shü, uko bu kediu Nebukadnezar chükeshü miarhiu seüdekecü nu vor kengulienu di.

³ Süla kedinuoko, kezhako, ahngko, mia tahitarhoyakezhako, kinyikeseko, kethoca cayakezhako, capimiako, mu kedirüvie nu kezhako pete vor kengulie, Nebukadnezar chükeshü miarhi seüde mhathoko chütuo üdi. Siro uko Nebukadnezar pie chükeshü miarhi mhodzünu thalie tse,

⁴ phekeshieko shiekhoui di, “He-i themiako, seyieko, mu die kekreikreikecüko pete ki diekhashüya,

⁵ süla nie mhakekhou pfhe, luoü, lyre, trigon, harp, übou, mu tsali doneiünei pfhe si ro, nie tsu di kediu Nebukadnezar chükeshü suna miarhiu rüsuotuo.

⁶ Kehoupuorei tsu rüsuo kemo-u rükri te kelhoupie süki mi chü sepie keba miü metsuo nu shü mhaiwatuo.”

⁷ Süla themiako chükia, luoü, lyre, trigon, harp, übouko mu tsali neiünei peteko pfhe sishü mumetha, themiako pete, seyieko, mu die kekreikreicü peteko tsu Nebukadnezar chükeshü miarhiu rüsuotaya.

⁸ Siro süteiki Chaldiamia huo tuo penuo vor, di Judako pejota.

⁹ Sidi uko sie kediu Nebukadnezar ki, “Kediu bu rhei kechau chüliecie.

¹⁰ He-i kediu noe thezho puo chüshü, süu themia kehoupuorei chükia, luoü, lyre, trigon, harp, übou, mu tsali neiünei pfheko sishü tse tsu suna miarhiu rüsuotuo üshüe,

¹¹ mu kehoupuorei tsu rüsuo moro kelhoupie mi tu kebau nu shüwatuo üshüe.

¹² Ru Judamia huo no uko pethopie Babilon kedirüvie nu mha kemeho kezha chü kebako: Shadrak, Meshak, mu Abednego; hako n dieze nu ba mo, he-i kediu uko n rhuoko lie chü ba mo mu ukoe no suna miarhi chükeshü rüsuo mo.”

¹³ Sitse Nebukadnezar puo nei mo se di Shadrak, Meshak, mu Abednego ze vornu pushü; süla uko süko ze puo mhodzünu vorshü.

¹⁴ Sitse Nebukadnezar sie uko ki, “He-i Shadrak, Meshak, mu Abednego, nieko a rhuoko lie chü mo mu nieko suna miarhiu rüsuo mo ücü ketho me?

¹⁵ Tsie nieko chükia, luoü, lyre, trigon, harp, übou, mu tsali neiünei pfhe kesiki tsu di a chükeshü miarhiu rüsuolie liro vi zo. Derei mhanuü nie rüsuo mvü ro, tsie rükri nieko kelhoupie mi tu kebau nu shüwatuo, siro terhuo kikecüpuonie a dzie nunu nie kelalie vituo ga?”

¹⁶ Sitse Shadrak, Meshak, mu Abednego ukoe kediu die kela di, “He-i Nebukadnezar hieko mha hau la we n ki hie mezhü pu morei vi.

¹⁷ Mhanuü Ukepenuopfü hie puo lie chüyakezhau mitu keba miu nu mu n dzie nu hie kelalietuo üro, he-i kediu, puo bu hieko kelaliecie.

¹⁸ Derei mhanuü silie lho zo ürei, süu n bu siliecie, he-i kediu, hie n rhuoko lie chülie lho mu hie no suna miarhi doukeshüu rüsuolie lho.”

Tu keba Miü

¹⁹ Sitse Nebukadnezar-e puo nou rüpe phi di Shadrak, Meshak mu Abednego petsou di puo zie teimekieta. Sidi puoe mi chüpie kezhü de va thenie chü petu salienu diekhashü,

²⁰ sidi puo rüpfhünuo donu kemecathomia bu Shadrak, Meshak mu Abednego phalie di kelhoupie miü nu khashüwanu diekhashü.

²¹ Süla uko phalie, uko boulie, u nei, u tsüreko, mu uko pfhenei kekrei rei se zo di uko kelhoupie mi tu se kebau nu shüwa.

²² Siro kediu diekhakeshüu chü mhai morosuota mu miu lethorkecü la miü bu Shadrak, Meshak, mu Abednego pie kevoko thekhriwa.

²³ Derei mia seko Shadrak, Meshak mu Abednego zowe u phapfü di le mi tu keba metsuo nu zhüta.

²⁴ Sitse kediu Nebukadnezar puo ngota di rükri sieta. Sidi puo mia tarhoyakezhako ki, “We mia se kelhoupie mi nu shü mo me?” Ukoe kediu ki, “He-i kediu, süu ketholie.”

²⁵ Sitse puo la sie, “Derei a u phreipfü ketha mia dia, miu metsuo nu chatuo ketuo ngute, mu uko the moto ze; tsiu u diau we terhuomia rhi mhiete.”

²⁶ Sitse Nebukadnezar mi tu keba kikha penuo phi di sie, “Shadrak, Meshak, mu Abednego, Kerükrietho Kepenuopfü kituoko, tuo parlie! Sidi haki vorlie.” Süla Shadrak, Meshak, mu Abednego ukoe miu nunu tuo parlie.

²⁷ Sitse Kedinuoko, kezhako, ahngko mu kediu themia mia tarhoyakezhako vor kengu kebako themia hako moko gei mi kekuo ba kemo, morei uko tsütha thewa kemo, uko pfheneiko thewa kemo, tsiu uko gei mi re rei tuo kemo ngulie.

²⁸ Sitse Nebukadnezar sie, “Shadrak, Meshak mu Abednego Kepenuopfü tsheliecie, puo dieliemia ketseshü di puo kituoko puo peleyakezhako kelakelieu. Ukoe kediu die ze mo mu uko Kepenuopfü zo kemosie terhuo kekrei puorei lie chü morei rüsuolie lho üdi uko phou khashü zo.

²⁹ Süla a thezho puo chüshüya: Seyie kehoupuorei morei die kekreikrei puyakecü kehoupuorei Shadrak, Meshak mu Abednego Kepenuopfü thakecümia u mo duchüdurhawatuo, mu u kiko bie perawatuo; terhuo kekrei hakemhie di mia kelashüketuo ba mo zocü la,” sita.

³⁰ Süsie kediu Babilon kedirüvie pete nu Shadrak, Meshak mu Abednego chü pezhashü.