Daniel 10 - Angami Naga CL (Re-edited) Bible (BSI)

Seyieko mu Teigei Kekuoko Kegeikecü

¹ Persia kediu Sairos dikelie cie se cie, die puo se par Daniel, puoü Belteshazar ükecüu pesishü. Dieu ketho zo, mu süu ketekegeikecü kezha puo dze. Puoe ziemho nunu dieu silie di puocapuola silie.

² A, Daniel, süteiki zhadoudo se a kra bata.

³ Sidi a kecüca keviko cü mo, themuo morei khubedzü rei pie a me nu shü mo, sidi zhadoudo seu tseita kemochie tier pie a tsü kenhe rei mota.

⁴ Siro thekhrü therieu zha mepfüedia, a kerü kezhau (süu üse Tigris üya) khieki tha,

⁵ sidi a meho sie ru linen pfhe dzie, Ufas nunu sunapfü pie puo chie phakepfü mia puo ngu.

⁶ Puo mo rei beril tsie tuoi, puo zie teikemela mhie, puo mhinie mitu tuoi, puo bou mu puo phinie mese kemeva tuoi, mu puo pfhephra rei krodi pfhephra mhiei zo.

⁷ A Daniel rübei ziemho-u kengu zo; a ze ketuoko u gei perüsürüsa vor zorei uko ziemho-u ngu mota, mu uko ta vo rüshüta.

⁸ Süla a bu a rübei ziemho kezha süu ngu. A kekuo jüta, mu a chü teimekie cacü zota mu a phisiata.

⁹ A puo dieko sishü, tsiu zerepfü di a sie si mo zhüta.

¹⁰ Derei thedzie puo a bieshü di a bu khoutoulie mu a dzienie pie nerhulie.

¹¹ Sidi puo a ki, “Daniel, thekhriekepfütho-u, a n ki die pushüketuoko rünyü touliecie. Siethalie, kekreilamonyü haha la a ketsepie n kishüwe.” Süla puo die hako pie a ki pu tha tse, a peta.

¹² Sitse puo a ki, “Michie hiecie, Daniel, kekreilamonyü no puocapuola silietuo üdi Kepenuopfü mhodzünu n thuo n chü kerünuokelie tei therie nunu, n dieko rünyüliete, mu a n dieko la vorzhie.

¹³ Derei Persia kedirüvie nu kedinuou zha mepfüepuo a perhiete. Süla Mikael, kedinuoko kezha puo vor a khruohishü, mu a puo bu Persia kedirüvie nu kedinuou ze bate,

¹⁴ sidi thelatsa n themiako gei kedipuo chü vortuo shicüko pie n bu silietuo üdi a vorte. Kekreilamonyü ziemho-u liro thiesie teisozha kekra late.”

¹⁵ Sidi puo a ki die hako pu tha mu a a ziepie kijü petsoushü tsiu a mhapuorei pulie mota.

¹⁶ Süsie themia kemhiecü puoe a tie bieshü tse a tiega sie di a mhodzü ketha themiau ki, “A niepuu, ziemho-u la kemezhiekecü a gei vorte mu a kekuo jüte.

¹⁷ Kimhie di a niepuu kituou a niepuu ze kerüchülie ta? Kekreilamonyü a pekhrukhrute, a gei kekuo puorei jüte, mu a thesü puorei a gei ba mote.”

¹⁸ Süsie themia kemhie puo a bieshü di a chü pekuoshü.

¹⁹ Puo sie, “Michie hiecie, thekhriekepfütho-u, n neilie. Meteilie mu thepfulie!” Puo a ki mha pushü ru a kekuo ngulie di sie, “A niepuu die pushücie, no a chü pekuoshüketa la.”

²⁰ Sitse puo a ki, “Kiüdi a n ki vor shi no si ba mo? A tsie vo Persiamia kedinuou ze keperhietuo, mu a puo biekewa sie, Grik kedinuou vortuo.

²¹ Derei kethodie dau nu thupie kebau a se n ki pushütuo. Mikael, nieko kedinuou zo kemosie, kedinuoko petsouketuo a zemia puorei ba mo.