Daniel 1 - Angami Naga CL (Re-edited) Bible (BSI)

Israel Khriesamia Dia Babilon Kediki nu Keba

¹ Juda kediu Jehoiakim dikelie cie se cie Babilon kediu Nebukadnezar Jerusalem nu vor di süu re.

² Siru Jihovae Juda kediu bu puo khro leta, süsie rei Ukepenuopfü ki nu mhabou huo rei sa. Puoe süko se Shinar kijü nu vor, di mhabouko pie puo rhuoko kinyibou nu bawa.

³ Süsie kediue puo ki kemeho kezhau Ashpenaz bu Israelmia kedi yie mu kevimia,

⁴ khriesa ulheulhou tseikecümia, zivi, mhasi cha kehoupuo nu rei kesimia tsiu mhacamhala si siro mha kele, kediki nu puo lie chülie kevimia huo ze vornuta; Chaldiamia mhasi mu puo die se uko pethalieketuo la.

⁵ Siro kediue teisonhie kediu kecüca mu zu nunu se uko ya chüshü. Cie se uko pethatuo, sidi süteiu tseilie tse uko bu kedikiu nu balie kevi chüketuo la.

⁶ Süko donu Juda yiemia Daniel, Hanania, Mishael, mu Azaria sa.

⁷ Siro kedikiu nu kezhau uko zathoshü: Puoe Daniel pie Belteshazar chü, Hanania pie Shadrak chü, Mishael pie Meshak chü, mu Azaria pie Abednego chü.

⁸ Derei Daniel-e kedimia kecüca mu zu zakeshüko pie puo thuo puo perhuwa molieketuo leta; süla puo kedikiu nu kezhau ki puo bu puo perhuwa molieketuo la cha.

⁹ Siro Ukepenuopfüe Daniel bu kediki nu kezhau nei chülie mu puo khriepfülie.

¹⁰ Kediki nu kezhau Daniel ki, “A a niepuu kediu preilie; puoe nieko cüükrie morokesuoko kedashüte. Mhanuü puoe nie chüümoe nieko tshümiako ki thachüketa ngu ro, niekoe a tsüu pie kemichie nu shüwatie.”

¹¹ Sitse Daniel-e sie kediki nu kezhau puo pethopie Daniel, Hanania, Mishael, mu Azaria mehokebau ki,

¹² “N pezie rei zha ker n kituoko dojüshücie. Hieko bu cüketuo la ga mu krieketuo la dzü rübei khashücie.

¹³ Sidi n thuo hieko rhi mu kediu kecüca zashü keba cükecüko kenguu mehoshücie, sidi nie kedipuo ngulietuo shi süu medzi di n kituoko gei chüshücie.”

¹⁴ Süla puoe pukeshü hau puo medolie di zha ker uko mehoshü.

¹⁵ Siru zha ker sie uko zieko kedimia kecüca cü kebako ki zivi mu ukoe luokuoketa ngulie.

¹⁶ Süla uko kepfheu kediu zakeshü kecücako mu zuko khashü mota, sidi gako pie uko tsüta.

¹⁷ Tsiu Ukepenuopfüe kesikele siro leshü mhasi kehoupuorei silieketuo do keviko se nuo dia hako tsüshü, mu Daniel bu ziemho tsiu u mho pete ca silie kevi pie tsüshü.

¹⁸ Siro kediu ki uko ze voketuo la kediue puotei chiekeshüu tsolie tse, kedikiu nu kezhau uko ze Nebukadnezar ki vo,

¹⁹ sitse kediu uko ze kerüchü. Siro uko peteko donu miapuorei Daniel, Hanania, Mishael mu Azaria mhielie mota, süla uko bu kedikiu nu bata.

²⁰ Siro mhasi mu mhacamhala sikelie cha kehoupuo nu rei kediu uko ketsokeshü ki, puo kedi khrükhro keba kemeduoko mu khrüthemvü dze kesiko, thuophiko, themouko pete ki va ker vikuokecü puoe nguta.

²¹ Siro Daniel-e Sairos dikecü therie cie ketso rei sünu bata.