Chieliko 99 - Angami Naga CL (Re-edited) Bible (BSI)

Jihova Israel gei Diethokecü

¹ Jihova di ba; seyieko bu peliecie; puoe cherubnie donu di ba; kijüu bu rünietalie.

² Jihovae Zion nu zha ba; mu puo seyie peteko mho rükriewe.

³ Uko bu n za kezha mu u ngokecüu tsheliecie; puoe mesa.

⁴ Kediue zha, puoe kethoca puo nei, puoe thetou pesieshü. Puoe Jakob gei kedietho mu kemiatho chüshü.

⁵ Nieko Ukepenuopfü Jihova chü kerükrieliecie, mu puo phiba kinu rüsuolie; puoe mesa.

⁶ Puo zievoko donu Mosa mu Aron, mu puo za kieyakezhako donu Samuel; uko Jihova kie ru puo uko pfhe khoshü.

⁷ Puo kimhou co-u nunu uko rüchü; uko puo zhapu die, mu puoe khapie uko ketsü thezhoko se tuolie.

⁸ No uko pfhe khoshü, Harie hie Kepenuopfü Jihova; noe uko kejo vashüyakezha Kepenuopfü, derei uko mhatho kesuoko la we siazha khashüyakezhau.

⁹ Nieko Ukepenuopfü Jihova chü pezhaliecie, mu puo kemesa kijüthouu geinu rüsuolie; Ukepenuopfü Jihovae mesacü la.