Chieliko 98 - Angami Naga CL (Re-edited) Bible (BSI)

Ukepenuopfü Kemiatho Tshekecü

¹ Harie, tsali kesa puo chüpie Jihova ki shülie; puo u ngocüko chükeshü la; puo dzie puo zatsa mu puo bou kemesaue puo la kelakelie chüshü.

² Jihovae puo kuokelie pie pesishüte; mu puo kemiatho pie seyieko pekieshü.

³ Puoe Israel kinumia gei puo kekhrie mu puo kedietho rükralie. Kijü kela petekoe Ukepenuopfü kelakelie nguwate.

⁴ Kijü pete kenei pfhe chüpie Jihova tsülie, kenei pfü kelishülie, mu ketshe tsali chülie.

⁵ Harp se di ketshe tsali chüpie Jihova ki shülie, harp se mu tsali chü di.

⁶ Ketsü mu tekuokia khou di kenei pfü shie Jihova u kediu mhodzünu vorlie.

⁷ Dzükezhau mu sünu ketuo khe bu ruorüilie; kijüu mu sünu lhou ketuo khe rei.

⁸ Dzüdiko bu dziedalie; kijüthouko bu keze u nei di kelilie.

⁹ Jihova mhodzünu kelilie. Puo kijüu nyie kecüketuo la vorzhie. Puo ketho tsiu kemezhü se di kijüu mu themiako nyie kecütuo.