Chieliko 96 - Angami Naga CL (Re-edited) Bible (BSI)

Ketshe Tsali

¹ Harie tsali kesa puo chüpie Jihova ki shücie; kelipie Jihova ki shülie, kijü pete.

² Kelipie Jihova ki shülie, puo za tshelie; teikesonhie puo kelakelie pesishü ba zolie.

³ Seyieko donu puo zapuzayieu pesishülie, puo mhatho u ngocüko themia peteko ki.

⁴ Jihova zha mu puo tshe phi zhücü la; terhuo peteko mho puo prei zhü.

⁵ Seyieko rhuoko we pete mirhi zocü la; derei Jihovae teiko chüshü.

⁶ Therhu mu kemesü puo mhodzü ba; kekuo mu zivi-e puo kemesachü nu ba.

⁷ Pie Jihova tsülie, nie themia seyieko, kekuo mu zapuzayie pie Jihova tsülie.

⁸ Pie Jihova tsülie, puo zae ngulie kezhü therhu se; mha khakeshü se vorlie, di puo kiluo nu vorlie.

⁹ Kemesa pfhenei se di Jihova rüsuoliecie; kijüu pete, puo mhodzünu pe zolie.

¹⁰ “Jihovae kediu” ücü seyieko donu pushülie! Kijüu se kemeteipie bawate, süu mhakipuorei rünielie lho. Puoe kemezhü nu mia nyie pepituo.

¹¹ Teiko bu u neilie, tsiu kijüu bu puo noumvülie, dzükezhau mu sünu ketuoko bu ruorüilie.

¹² Lieko mu sünu ketuo khe bu u nei philie; sitse ketsa nu seiboko pete rei u kenei pfü kelituo.

¹³ Ukoe Jihova mhodzünu kelituo, puo vorzhücü la, puo kijüu nyie pepiketuo la vorzhie. Puo ketho tsiu kemezhü se di kijüu mu seyieko nyie pepituo.