Chieliko 94 - Angami Naga CL (Re-edited) Bible (BSI)

Ukepenuopfüe Kemiathomia Keyau

¹ He-i Jihova, khepu Kepenuopfü, no khepu Kepenuopfü, zie parshücie.

² Sieliecie, harie kijü capiu; kokezhako ngu kezhüu pie uko tsücie.

³ Kerüzhümia bu kichiepuo, He-i Jihova! kelhiekecümia bu kichiepuo kuo batieya mu?

⁴ Ukoe kelhiekecü die lashüya; kesuomia pete u melha ü u tshupfü tuoya.

⁵ Ukoe n themiako kedeshüya, he-i Jihova, uko n kayieu pese.

⁶ Uko samipfü mu rüso-u dukhri, ukoe merünuoko dukhri.

⁷ Ukoe sie, “Jihovae nguya mo, Jakob Kepenuopfüe siya mo,” iya.

⁸ Leshücie, nie kerüvo themiako donu mhalekemoko; kenyako, nie kinhiepuo mhasilietieya mu?

⁹ U nyie chükeshüue mhapfhe si lho üme? themhi chükeshüue mha ngu lho üdi me?

¹⁰ Seyieko pethayakezhau siazha khashü lho üme? Themia pethayakezhau mhasi jü üya me?

¹¹ Jihovae themia noudoko siya; sükosü kemethuo thesü puo zocü.

¹² He-i Jihova, no puo pethashüyakezhamia sü ruokuomia, no n zho se pethakeshümia sü.

¹³ Kerüzhümia la thekre puo thielie kemochie, noe kemezhiekecü zhako nunu kerülei pie uko tsü.

¹⁴ Jihovae puo themiako meliewa lho; mhakipuorei puo kayieu khashü motalie lho.

¹⁵ Kemiathomia gei kethocau vor zotuo, mu u nou kemezhü khe süu medzi zotuo.

¹⁶ Supuonie a la kerüzhüko petsou tuo ga? supuonie a la sie di kesuomiako petsou ta?

¹⁷ Jihova thuo a khruoshü motuo üro, a ruopfüe mekriemeza kemora lhou zita mecie eru.

¹⁸ “A phi tsierhietazhie” idi a leketa ki, harie Jihova, noe a khrielekhriethor di a phoushü.

¹⁹ A nounyüko kra seketa ki, no a ruopfü thupeluoshü.

²⁰ No dietho kemo kezhamiako ze mhachülie vituo me? Kelhiekecü zho chüshüyakezhako.

²¹ Uko kepekrolie di kemiathomia petsouya, sidi jokemomia pie kesia nu shüya.

²² Derei Jihovae a kudau chüte, mu a Kepenuopfüe a keya tsiekrieu chülie.

²³ Puoe uko kephouma zha chüpie uko tsütuo, mu uko kerüzhü la uko pekawatuo, Jihova, úko Kepenuopfüe uko pekawatuo.