Chieliko 92 - Angami Naga CL (Re-edited) Bible (BSI)

Jihova Ketseikevi la Puo Ketshe

¹ Jihova theziekecüe viwe, ketshe tsali chüpie n za tshekecüe vi, He-i Kerükrietho-u.

² Khise gei no hie khrielekhriethorkecü, mu theva gei n dietho pesikecü,

³ übou puo rhü ker kenyi lyre se mu harp pfhe kemesü se di.

⁴ Jihova, n mhathoko nunu a bu a neilie; a n dzie mhathoko la a kenei pfü keliyawe.

⁵ N mhathoko kide zha shi, he-i Jihova! N nouleko sou ze!

⁶ Mhalekemo themiau we haha siya mo, morei kenyau rei lelieya mo.

⁷ Kelhiekecümia thuo nha tuoi thesier rei, mu kerüzhümia pete kruosieta ürei, uko kechachie kepeka ngu zotuo.

⁸ Derei Jihova, no we kechachie rükrie zotuo.

⁹ Harie, Jihova, n ngumvüko we; n ngumvüko sü kata zotuo; kesuo kechümia pete cüreta zotuo.

¹⁰ Derei noe a kia chü kerüka pie nhathu kia tuoishüte; tier kesa pie a tsü kenheshüte.

¹¹ A mhi-e a ngumvüko tetsuketa ngu; a nyie-e a ngumvü kerüzhüko pekakewa site.

¹² Kemiathomia kukuobo tuoi kruolietuo; lhoupie Lebanon nu sedar tuoilietuo.

¹³ Uko leipie Jihova kiu nu shü, Ukepenuopfü kiluo nunu uko kruo sielietuo.

¹⁴ Uko botsata rei uko si vüshü zotuo, uko pejo mu rheirhie ba zotuo;

¹⁵ di, Jihovae mezhü; mu a tsiekrieu ücü pekie tuo zotuo, puo nou miatho kemo puorei jü ücü pesishütuo.