Chieliko 91 - Angami Naga CL (Re-edited) Bible (BSI)

Kuokejokejüu Khrükhro Bakelie

¹ Kerükrietho-u khrükhro lhoukezhau, Kekuotho-u khrü nu rüzhüpfükezhaue.

² Jihova ki, “Puo a keyau mu a dahouu, a puo peleyakezha a Kepenuopfü zo,” ituo.

³ Puoe ratho-u ciephrie mu siatalie kevi thepe nunu n kelashütuo.

⁴ Puoe puo shüka pie n yalietuo, mu noe puo shü khro nu rüzhülietuo; puo kemiatho sü n zhü mu n keya zo.

⁵ No theva gei kemeriekecü preilie lho, morei khinhie gei pruoyakezha theütsie shierei,

⁶ kezei nu tuoyakezha thepeu, morei khinhieluo mha pekayakezha thesau rei.

⁷ Thenyie-e n tseitsa tetsu, mu nyie ker n zatsa tetsuta rei; süu n penuo vor lho.

⁸ No we n mhi üse mehokecü zotuo, di kerüzhüko gei siazha khakeshü ngutuo.

⁹ Kekreilamonyü noe Jihova pie n keyau chüliete, kerükrietho-u pie n kebachü chükelie la.

¹⁰ Mha kesuo n gei vorlie lho, kepeka rei n pfheki penuo vor lho.

¹¹ Puoe puo dielieko bu n cha peteko nu n vaphilienushütuocü la.

¹² Ukoe uko dzie nunu n pielietuo, sitse ketsie geinu n bu n phi kesewa molietuo.

¹³ No loshau mu nyhübvü kedetuo; no losha nuonuo mu tinyhü n phi khro nu kedetuo.

¹⁴ A puo khrieyakezhamia, a sümia kelashütuo. A puo yalietuo, puo a za siyacü la.

¹⁵ Puo a kietuo, mu a puo pfhekhoshütuo; puo kemezhiekelie ki a puo ze tuotuo; a puo kelashütuo, mu puo rhushütuo.

¹⁶ A rhei kecha üse puo kelhuo chüshütuo, mu a kelakelie pie puo pekieshütuo.