Chieliko 9 - Angami Naga CL (Re-edited) Bible (BSI)

Kedietho Capi la Kecha

¹ A n tshetuo, Jihova, a nou pete se; a n mhatho u ngo zocüko pete se pesishütuo.

² A n geinu a nei mu a noumvütuo: A kelipie n za tshetuo, He-i Kerükrietho-u.

³ A ngumvüko rürei pesieketa ki, uko n mhingu nu tetsu di kate.

⁴ Noe a mezhü rüguo mu a zha piekeshü la; noe kediba gei ba di kedietho nu mha pepi.

⁵ No seyieko kerhieshü, no kerüzhüko pekawate, no kechachie la uko za vawate.

⁶ Ngumvüko kechachie kekau ze ta jüte; no u nadiko phewate, uko dze si sa mote.

⁷ Derei Jihova we di sei baya; puoe mia nyie pepituoü puo kediba keseliete.

⁸ Puoe kedietho nunu kijüu nyie pepiya, puo kemezhü tou pie themia nyie pepishüya.

⁹ Jihovae mia u pesekezhako la kuda puo zo; kemezhiekecü teiki kuda puo.

¹⁰ N za kesi khe n peletatuo, Jihova, noe n pfhüyakezhako khawaya kemo la.

¹¹ Ketshe tsali chüpie Zion nu bayakezha Jihova ki shüliecie; seyieko ki puo mhathoko pu pesishülie.

¹² Thezie khepu pfhüyakezhaue süko rükraya; puoe kemezhie kebako pfhe rükra motaya mo.

¹³ Jihova, a ngumezhieshücie, a rütseyakezhako kinu a kemezhiekelieko leshücie, no kesia careko nunu a phouse siershüyakezhau.

¹⁴ Silie liro a Zion nuopfü careko nunu n ketshe pie pesishütuo; a n kelakelie nunu a neituo.

¹⁵ Seyieko u thuo chükelie thekhe nu telete; uko thuo keviepie keba dorü nunu uko phi maliete.

¹⁶ Jihovae capi chükeshü nunu mia puo silieya; kerüzhüue puo thuo puo dzie pie chükeshü nunu puo maliete. [Higaion. Selah]

¹⁷ Kerüzhüu Sheol nu votatuo, Ukepenuopfü rükraya kemo seyie pete rei.

¹⁸ Ketsopfhüko rükra mo seiketa chülie lho, morei kejüko kemerüu kechachie jüketa chülie lho.

¹⁹ Sieliecie, Jihova, chüüphouko bu kuolieta hie; n mhinguki nu seyieko nyie kecüwacie.

²⁰ He-i Jihova, kemichie pie uko gei shücie; seyieko bu ukoe themia zo ücü siliecie. Selah