Chieliko 89 - Angami Naga CL (Re-edited) Bible (BSI)

Jihovae David Ze Kediekhokelie

¹ A Jihova kekhrie rüdirüliya kemo pie keli sei tuo zotuo, a tie üse n kedietho pu thephou pete pesituo.

² Ae n kekhrieu kechachie la pesieliete, n kemiathoe teiko tuoi metei üshü.

³ No pucü, “A kedakelieu ze dietseidiekho puo chülie, a kituou David ki rüseshü,

⁴ ‘Ae kechachie la n se n yie pesieshütuo mu n kedibau thephou pete nu chü kemeteishütuo.’ ” Selah

⁵ Teiko bu no u ngocüko tsheliecie, He-i Jihova, tsiu kemesako kro nu n kedietho tshecie.

⁶ Teimeluo nu rei supuo pie Jihova ze kemejülie ta? teigeimiako supuo Jihova mhie mu?

⁷ Kemesako kehou nu rei Ukepenuopfü we preiya zo; puo khieümhou kebako pete ki rei zha mu u ngokuo.

⁸ He-i Jihova, krodiko Kepenuopfü, He-i Jihova, supuo n mhie di kuo ga? N kedietho sü n houpfü baya.

⁹ No dzükezha noupfhüu kekhaya; süu rüpfhü kesie ki no kekha zeiwaya.

¹⁰ No Rahab kedepie kesiamo tuoiwa; no n bou kekuo üse n ngumvüko phruo kecürewa.

¹¹ Teiko n vie, mu kijüu rei n vie zo; no kijüu mu sünu ketuo kheko chüshü.

¹² Pesotsa tsiu pekhrotsa rei, noe chüshü; Tabor mu Hermon u nei di n za tsheya.

¹³ N bou kuo phi; n dzie-e kuo, tsiu n zatsae rükrie.

¹⁴ Kemezhü tsiu kediethoe n kediba mvüdze zo; kekhrie mu kemiathoe n mhodzünu tuoya.

¹⁵ U nei keba thepfheu sikezha themiako thejakepfütho, sümia n zie kezieu nu tuoya, harie Jihova.

¹⁶ Uko n zau nunu zhate u nei baya. Uko n kemiatho-u nunu u nei phiya.

¹⁷ No sü uko zayie mu kekuou zo, n neikelie la no hie kia chü kerükrieshü.

¹⁸ Hie zhü sü Jihova vie, mu hie kedi-e Israel kemesau vie.

¹⁹ No ziemho nunu n kemesako ki mha pu di, “A keditsürepie kekuomia puo gei shü; A themiako donu kedakelie puo chü pezhashü.

²⁰ A a kituou David ngulie, Ae kemesa tier pie puo kenheliete.

²¹ A dzie puo ze sei tuotuo; a bou puo chü pekuoshütuo,

²² puoe ngumvümia do lhotalie lho; morei kerüzhümia puo pie ketheselie kenjü.

²³ A puo mhodzüki nu puo ngumvüko kedeshütuo; mu puo mecüyakezhako kepfhüwatuo.

²⁴ Derei a dietho mu jütalie kelho kekhrie-e puo ze tuo zotuo, mu a za nunu puo kia chü kerükrieshütuo.

²⁵ A puo dzie pie dzükezha mho shütuo, mu puo dzie puo zatsa pie kerüko mho shütuo.

²⁶ Puo a kie di, ‘No a puo, a Kepenuopfü, a kelakelie Tsiekrieu!’

²⁷ A puo chüpie a nuorieu chüshütuo, kijüu kediko donu kerükrietho-u.

²⁸ A puo khrielekhriethor zotuo, mu a puo ze dietseidiekhokelieu metei tha zotuo.

²⁹ A kechachie la puo tsiau pesieshütuo, mu puo kedibae teiko keba chie batuo.

³⁰ Mhanuü puo nuonuoko a zho khawa mu a diekhakeshüko nu tuolie moketa sie,

³¹ uko ahzako varhuo mu a diekhakeshüko ze mota üro,

³² a seiro se di uko kekrükecüko pechütuo, mu uko kemou la thepetheruo khashütuo;

³³ derei puo kinu a kekhrie chüwalie lho, a dietho-u nu tso moketa chülie lho.

³⁴ A a dietseidiekho-u varhuowalie lho, a tie nunu parketau rhü lawalie lho.

³⁵ A va puo a kemesau geinu rüseshüwate; mu a David gei tijüshü lho.

³⁶ Puo tsia bu kechachie tuo zotuo, mu puo kediba bu a mhodzünu niaki tuoi batuo.

³⁷ Süu chüpie khrü tuoi ba sei zotuo, teigei kedietho zhapuu.” Selah

³⁸ Derei no puo khawa mu puo meliewate, noe kenhekelieu gei n nou meyie phite.

³⁹ No n kituou ze dietseidiekhokelieu rhüwate, mu nyophe nunu puo keditsüreu perhuwate.

⁴⁰ No puo sozhako pete bierhuo, mu puo badiko pekaperuowate.

⁴¹ Kekhokeke pete puo vie va, puo zanuomia krenyü chü.

⁴² Noe puo ngumvümiako dzie thezatsa chü pezhashüte, no puo ngumvüko pete bu u nei.

⁴³ Noe puo zhiecha puoütsa kereiwate, terhü nu puo khruohishü mota.

⁴⁴ No puo dzie nunu kedi theu chüwa, mu kedibau kelhoupie nyophe nu shüwa.

⁴⁵ No puo khriesa zhako da pedzüwa, thenga pie puo zewate. Selah

⁴⁶ Jihova, kichiepuotieya mu? No kechachie n thuo n kevie se tuotatuo me? N noupfhü bu kichiepuo mi tuoi tu ba zotieya ga?

⁴⁷ A kelhouu kide dzü shi rükrashücie. No kidi kemethuo puo la themia chüshüte mu?

⁴⁸ Supuonie kesia ngu mo di rhei volie vituo mu? Morei mekhru kekuo nunu puo kelalie vituo mu? Selah

⁴⁹ He-i Jihova, n kekhrie kerieu kirapuo tuota ga? N kedietho kikecü nunu no David ki rüseshü ga?

⁵⁰ Rükrashücie, he-i Jihova, n kituou krekecüko, kimhie di a nou nu themiako a kengakecüko pfü ba shi,

⁵¹ He-i Jihova, n ngumvüko kedipuo se n kenga shi, kedipuo se noe kenhekeshü chaprako kenga shi,

⁵² Telhekechachie Jihova bu thetshekepfüu chücie. Amen mu Amen.