Chieliko 88 - Angami Naga CL (Re-edited) Bible (BSI)

Kesia nunu Kelashünu Kecha

¹ Harie Jihova, a kelakelie Kepenuopfü, a teizeiteiso n mhodzüki melieshüya.

² A kecha bu n ki vocie; n nyie kedeipie a pfhe rünyüshücie.

³ Kemezhiecü a ruopfü tshute, mu a kelhoue mekhru penuo votazhie.

⁴ Thekheu nu keleko sa a phrüliete; a kekhruohi kejüko mhiete,

⁵ rükra moketa siaketamia mhiete, dukhrikewako mekhru nu kezhü mhiete, noe uko rükra sa moketa tuoite, ukoe n dzie nunu dathewaketa la.

⁶ Noe a pie Thekhe kesouko nu shüwate, kezei kesoutho nu.

⁷ N nouyieu a gei mesite; noe dzükerüpfhü kere pete pie a vuliete. Selah

⁸ Noe a khriethoko bu a gei u ziejü tuote, a chüpie uko mhodzünu thiketuo puo chüwate, a bowate, mu a pralie kenjüte;

⁹ thenou kesuo la a mhi merüte. He-i Jihova, a teisonhie n kieya zo; a dzie yhapie n kitsa va.

¹⁰ No u ngoko chüpie kesiamia kieya üme? siaketako sielie di n tsheya üme? Selah

¹¹ Mekhru nunu n kekhrie, morei keka nunu n kemiatho pesishütuo me?

¹² Kezei nu n mhatho u ngoko silie vituo me? morei mha rükraya kemo kijü nu n kelakelie kekhruohi silie vituo me?

¹³ Derei, He-i Jihova, a we n ki rükhruoshüya; khise a kecha n mhodzünu vorya.

¹⁴ He-i Jihova, no kiüdi a meliewa mu? No kiüdi a kinu n zie kevielieta ga?

¹⁵ A khriesaki nu hieshiehieruo mu kesia penuo di vor; kemichie nu tuote; a mekeso chüte.

¹⁶ N nouyieu a zepfü vorte; n kinu kevor kemeriecüko a pekawate.

¹⁷ Süko dzüdi tuoi teisozha pete a houpfüliete; uko keze a hou tseipfü bate.

¹⁸ Noe a khriemia mu a khriethomia kevor khawate; mu a kezemiako kezei nu tuote.