Chieliko 85 - Angami Naga CL (Re-edited) Bible (BSI)

Seyieu Zhazhü la Kecha

¹ Jihova, noe n kijüu gei vishüte, no Jakob ruo chü pekuo lashü.

² No n themiako kemou vashü, no uko kephouma pete whewa. Selah

³ No n nouyie pete late; n nouyie kereu nunu rüreite.

⁴ Hie chü pevi lashücie, Harie hie kelakelie Kepenuopfü, sidi hie gei n nei kemo pejücie.

⁵ No hie gei n nei mo sei tuotuo me? N nouyie bu thephou pete gei pfütuo me?

⁶ No hie chü perhei lashü lho me? n themiako bu n geinu u neilieketuo la.

⁷ He-i Jihova, kela kejü n kekhrieu pie hie pekieshücie, mu n kelakelieu pie hie tsücie.

⁸ Ukepenuopfü Jihovae puketuoko a bu rünyücie; puoe noune pie puo themia, kepeleko, u nou rüditaya kemoko ki putuo.

⁹ Ketho zo, puo kelakelie sü puo preikezhako penuo ba zo, puo zayie bu u kijü nu balieketuo la.

¹⁰ Kekhrie tsiu ketho nie-e kesetuo; kemiatho mu noune nie-e kemebotuo.

¹¹ Kethoe kijü nunu siertuo, mu kemiathoe teigei nu mehotuo.

¹² Jihovae keviu khashütuo, mu u kijüu puo lieyie krakuolietuo.

¹³ Kemiathoe puo mhodzü votuo, sidi puo phichako la cha keseshütuo.