Chieliko 84 - Angami Naga CL (Re-edited) Bible (BSI)

Ukepenuopfü Rüsuoki Kemengu

¹ N kebachüu kide u nei shi, Harie krodiko Jihova!

² A ruopfüe Jihova kitiezhako menguya, mengupie phisiaya zo; a melou mu a chüe kelipie rhei keba Ukepenuopfü kieya.

³ N ruosuobau nu ciekhrienuoko u ki ngulie, tsiu kitienuoko u thuo u kru chülie, puo nuonuo bu rüselieketuo la, Harie krodiko Jihova, a Kediu mu a Kepenuopfü.

⁴ N ki nu lhoukezhako thejakepfütho zo, süko we n tshe sei ba zotuo. Selah

⁵ N geinu kuo kebaue thejakepfütho zo, Zion nu kevo chako puo nou tuo.

⁶ Uko Baka razha pfüthe kevo ki, süu pie dzüluo chü puo chüshü, teirü kerieu dzü pethoushüya.

⁷ Ukoe kekuo sie kuolielieya; Zion nu keba peteko Ukepenuopfü mhodzünu thalie kemochie.

⁸ Harie krodiko Kepenuopfü, Jihova; a kecha rünyüshüyi; Harie Jakob Kepenuopfü. Selah

⁹ Harie Kepenuopfü; hie zhüu; noe kenhekelieu zie mehoshücie.

¹⁰ Khunhie n kitiezha nu keba we, kekreira thenyie-e ki vikuo. A we kerüzhüko pfheki nu lhoucüu ki rei, Ukepenuopfü kicie kepfheu chü keba we a neikuo.

¹¹ Ukepenuopfü Jihovae niaki tsiu pezhü zokecü la; puoe ngukemezhie mu therhu khashüya. Kemezhüko kinu, Jihovae mha kevi puorei khase bataya mo.

¹² He-i krodiko Jihova, n pelekezhamia sü thejakepfütho zo.