Chieliko 81 - Angami Naga CL (Re-edited) Bible (BSI)

Kepenuopfü Ketseikevi mu Israel Kerütsi

¹ Keli petopie u kekuo Kepenuopfü ki shülie, kenei la shiepie Jakob Kepenuopfü ki shülie.

² Tsali puo sedelie, tambourin kekreishülie, u kenei harp mu lyre pe di.

³ Khrüsa ki, khrüluo ki, mu u nyi zha nhie ketsü khoushülie.

⁴ Süue Israel zhokecü la, Jakob Kepenuopfü zho zo.

⁵ Puoe süu Josef gei thezho puo chüshü, puo Ijipt kijü nu kevo ki. A siya kemo mhapfhe puo si:

⁶ “A n bouka geinu n pieu lhouwa; merhau nunu n dzienie se parshü.

⁷ No kemezhiekelie ki melieshü, ru a n kelashü; a teikese kepekhre chü nunu n die kelashü; a Meriba dzüko nunu n dojüshü. Selah

⁸ Rünyüliecie, Harie a themiako, a nie tarho ketha ki! He-i Israel, no a pfhe rünyülietuo üro;

⁹ Terhuo kekrei puorei nie donu balie lho; no nuketsu si kemo rhuo puorei rüsuolie lho.

¹⁰ A Jihova, n Kepenuopfü, Ijipt kijü nunu n ze parkeshüu; n tie mekuo kemeyashücie, sitse a süu tshushütuo.

¹¹ “Derei a themiako a pfhe rünyü mote; Israel-e puo khapie a tsütuoü mote.

¹² Süla a uko khapie uko nou kere nu shüwa, uko bu uko medoko nu tuotaketuo la.

¹³ A themiako a pfhe rünyülie ücüwe! Israel-e a chako nu tuolie ücüwe!

¹⁴ A uko ngumvüko penyü mhaishütieciü, mu a dzie pie uko ngumvüko petsoutieciü.

¹⁵ Jihova ngumecüyakezhako puo mhodzünu rünhe ketatuo, mu uko siazha we kechachie ba sei zotuo.

¹⁶ A thoulha kememhiethopfü pie n vachütuo; mu tsiekrie geinu kepar mepfhidzü pie n kelhuo chüshütuo.”