Chieliko 80 - Angami Naga CL (Re-edited) Bible (BSI)

Israel Kelashünu Kecha

¹ Rünyüshücie, harie Israel Kepfheu, tekuokro puo tuoi Josef cha tha ze tuoyakezhau! No cherubnie donu di keba, zie parliecie.

² Efraim tsiu Benjamin mu Manasseh mhodzünu, n kekuou piesieshülie, sidi vor hie kelaliecie!

³ Hie chü pevi lashücie, He-i Kepenuopfü; n zie zieshücie, hie kelalieketuo la.

⁴ He-i Jihova, krodiko Kepenuopfü, no kichiepuo n themiako kecha gei n nei mo ba zotuo ga?

⁵ Noe mhidzü niekhrüda pie uko vachü, mu mhidzü pie uko hie ketshu chüpie uko bu krie.

⁶ No hie chüpie zanuomia bu hie meleketuo chüshü, mu hie ngumvüko uko donu nyü baya.

⁷ Hie chü pevi lashücie, He-i krodiko Kepenuopfü; n zie bu hie gei zieshücie, hie kelalieketuo la.

⁸ No Ijipt nunu khube puo se vorshü; no seyieko whuowa di süu leishü.

⁹ No süu la kijüu mesashü; mu süu puomie kre pesoulie di kijüu tshuta.

¹⁰ Süu khrü thuo kijüthouko soulie, tsiu puo coko thuo sedarbo kekuoko soupfülie.

¹¹ Puo coko the vo dzükezha tso, mu puonuotheko kerü tso.

¹² No kiüdi puo cakhako bierhuowata di chau nu kevo khe bu puosi riewata ga?

¹³ Ketsa nu menyi bu puo menyüwate, kemele pete süu pie u ca chü.

¹⁴ Rürei lashücie, He-i krodiko Kepenuopfü; Teigei nu mehoshü di khube hau le lashücie.

¹⁵ N dzie n zatsa thuo sekeshü mvüu.

¹⁶ Ukoe mi pie süu thewate, ukoe süu wiwate, noe kerhiekeshü la n themiako ruote.

¹⁷ N dzie bu n zatsa kethau gei balie, n thuo n la chü pekuokelie themia nuou gei!

¹⁸ Sitse hie n ki nunu rürei latalie lho zo; hie chü perheishücie, siro hie n za kietuo.

¹⁹ Hie chü pevi lashücie, harie Jihova, krodiko Kepenuopfü; n zie bu hie gei zieshücie, hie kelalieketuo la.