Chieliko 79 - Angami Naga CL (Re-edited) Bible (BSI)

Jerusalem Pekakewa la Thekrü Kechü

¹ Harie Kepenuopfü, seyiekoe n kayie nu vorte; ukoe n kemesa rüsuokiu perhuwate, ukoe Jerusalem peruowate.

² Ukoe n kituoko mo pie teirako ca chüwate, n kepelemiako chüpie kijü nu nhachüko tsüwate.

³ Ukoe thezie pekru pie dzü tuoi Jerusalem pete ketshuchü, mu miapuorei uko kekhru jü.

⁴ Hie hie zanuomia krenyü chüte, hie khie hie mhou ketuoko bu hie mele mu hie tha.

⁵ Harie Jihova, kichiepuotieya mu? No kechachie n ro di mi ketu mhie n nou meyie ba zotuo me?

⁶ N nou kemeyieu rupie n si kemo seyieko, mu n za kieya kemo kediko gei shüwacie.

⁷ Uko Jakob tecülie, mu puo kebachü pekaperuowate.

⁸ Hie puonuoko kejoko pie hie petsouta hiecie; n kekhrie pie hie gei vor mhaishüyi, hieko rünuo phi tuoketa la.

⁹ Hie khruohishücie, Harie hie kelakelie Kepenuopfü, n zayieu la, hie zeliecie mu hie kephouma vashücie.

¹⁰ Kiüdi seyiekoe, “Uko Kepenuopfü kirapuo ba ga?” iya. N kituoko zie pekrukewa khepuu pie hie mhinguki nu seyieko pesishücie.

¹¹ Kediemia meheimelocü pfheu bu n mhodzünu vorlieyi, n kekuo kezhau pie pesiawatuoü kebako pekrushücie.

¹² Harie Jihova, hie zanuoko n krekecüu, de thenie pie uko merü gei shücie!

¹³ Sitse hie n themiako, n rituo nu kirikoe kechachie n tshetuo; phou puo sie puo idi keputuo.