Chieliko 76 - Angami Naga CL (Re-edited) Bible (BSI)

Kekuo mu Capi Kepenuopfü

¹ Juda nu Ukepenuopfü siya; Israel nu puo za zha phi.

² Puo kemesachüu Salem nu ba, tsiu puo kebachü Zion nu ba.

³ Sünunu puoe theütsie kemevako, pezhü, zhiechako, mu terhü rünyieko bietsheshü. Selah

⁴ No zapuzayie kechüu, kijüthou ba seiyakezhako ki rei no we therhukuo mu zayie chükuo.

⁵ Kethepfuko kinu mhavako pieliete, uko rünhe tsute; terhümiavimiako puorei u dzie yha sielie mote.

⁶ Harie Jakob Kepenuopfü, no ruokeshü ki kierbagei mu kier kemekrie thate.

⁷ Noe u ngo zo ketho; n nou meyie siekecü ki supuonie n mhodzünu thalie ta?

⁸ No teigei nu theca khashü; mu kijüu michie di kemekrieta;

⁹ Ukepenuopfüe mia u pesekecüko kelakeshü theca khashütuoü kesie ki. Selah

¹⁰ Themia nouyie we n tsheyakezha zo; noe nouyie thelau chü dziekelie ki.

¹¹ N die phrapie Jihova n Kepenuopfü ki shülie, mu süko chüshülie; puo khieümhou keba pete bu mha se vor u ngokecüu tsüshülie;

¹² kedinuonuoko dawayakezhau; kijü nu kedikoe preiyakezhau.