Chieliko 75 - Angami Naga CL (Re-edited) Bible (BSI)

Ukepenuopfü Kemiatho Capi

¹ Hie n tsheya, He-i Kepenuopfü; hie n tsheya, n zae hie dzüki ba zo. N mhatho u ngo zocüko mia puya.

² Ae puotei chiepie kebau nu ketou nu capi chüshütuo.

³ Kijü mu sünu themia pete rünieketa ki, ae süko coko mengu kemetei se thaya. Selah

⁴ Kemelhakezhau ki, “Kemelha hie” idi a puya, mu kelhiekecüko ki, “N kiako pie kerüka hie.

⁵ N kia pfü kerükata hie, morei pietsükemvü vo se die pu hie.”

⁶ Niathutsa nu morei niakratsa nu morei rayha nunu mia piesiekeshüu vorya mocü la.

⁷ Ukepenuopfü thuo thenyie pepishüya, puoe mia puo bie kerünuoshü, mu kekreiu pie kerükrieshüya.

⁸ Jihova dzie nu tehie puo keba la, mu khubezu meluo di; süu mha kereipie tshu ba; puoe süu nunu sokokecü perupie; kijü nu kerüzhüko pete bu krie peso zo tsu puo khie rei tuo mota zo.

⁹ Derei a we kechachie a nei tuotuo, a we kelipie Jakob Kepenuopfü tshetuo.

¹⁰ A kerüzhümia kia pete dawatuo, derei kemiathoko kia we piesieshütuo.