Chieliko 74 - Angami Naga CL (Re-edited) Bible (BSI)

Seyieu Kelashünu Chakecü

¹ He-i Kepenuopfü, no kiüdi kechachie hie khawata mu? Kiüdi n rituochü nu ketuo kuoko gei n noukemeyie bu khu sieta ga?

² No thiedzütho khrülieketa n kehouu rükrashücie, n kayie chütuo üdi n thuo rhalieketau; Mu no n kelhouchü Zion Kijüthouu rükracie.

³ N phichako pie kechachie ruoketa kitsashücie, ngumvümia bu kemesachüu nu keba pete pekaperuowate.

⁴ N ngumvümiakoe n kemesachüu donu ruorüi bate; sünu uko thuo uko zasiu pesielie.

⁵ Ukoe seidurüko se kicie mhotsa sei sozhau durhuowate.

⁶ Sidi uko seidurüko mu metevüko pie sei kepie puokhu kethuko rei dutshedutshawa.

⁷ Ukoe mi pie n kemesachüu thewate; uko n za kebachüu bie perhupie kijü shüwate.

⁸ Uko u thuo u rüchü di: “We uko peka lotsowatuo,” iya. Ukoe kijüu nu Ukepenuopfü rüsuoyakezha ki pete thewa.

⁹ We u zasiko ngu mote; siedzekesi puorei tuo mote, kichiepuo hi batie shikecü kesi puorei u donu tuo mote.

¹⁰ Harie Kepenuopfü, ngumvümia bu kichiepuo n pie kethekre batieya ga? Ngumvümia bu kechachie n za tha ba zotuo me?

¹¹ Kiüdi n dzie kekhalieta ga? Kiüdi n dzie pie n merü gei ba zo ga?

¹² Siürei Kepenuopfü a kediu sü thiedzütho nu ketuou zo. Kijü nu kelakelie chü baya.

¹³ No n kekuo üse dzükezhako kezawa: no dzü nu ketuo dragonko tsü vütshiewa.

¹⁴ No dzü nu ketuo Leviathan tsüko bietshie phaphawa: No puo khapie rayha nu khunuoko ca chüwa.

¹⁵ No dzüluo mu rücüko duphashü; no kru seikezhü dzüluoko pesowa.

¹⁶ Teiso n vie, teizei rei n vie zo; noe khrü mu niaki chüshü.

¹⁷ No kijüu vala pete chüshü; noe teisei mu teile chüshü.

¹⁸ Ngumvüu n krekecüu rükrashücie, Harie Jihova; mu mesa kemomia n za thakecü rei.

¹⁹ N paruonuo phouu pie nhachüko tsüwa hie; kechachie n themia ketsopfhüko rükra mota hiecie.

²⁰ N dietseidiekho-u rhushücie; kijüu nu thechü kezei peteko nu zhosuo tshupfü tuoketa la.

²¹ Mia u kepeseko bu thenga chüta hieyi; kejüu mu ketsopfhüu bu n za tshecie.

²² Harie Kepenuopfü, sielie di n zha puliecie; mesa kemo-ue zhate n krekezha rükrashücie.

²³ N ngumvüko meyhu ketha rükra mota hie; n kepetsouko bouübi keba pfhe rei.