Chieliko 73 - Angami Naga CL (Re-edited) Bible (BSI)

Kerüzhümia Thela Puo Keka

¹ Ketho zo, Kepenuopfü sü kediethoko gei vi, u nou kemesako gei rei.

² Derei a we a phi mesüta nyünuo; a phichako tsierhielie nyünuo.

³ Ae kerüzhakecüko, tsiu kelhiekecüko kruokelie ki a rota.

⁴ Uko kechükenyü puorei seüdzülie mo, uko phou shürho mu mecamekhro zo.

⁵ Kekreimia tuoi di ukoe kemezhiekecü dzüya mo; mia tuoi di thesa ngu mo.

⁶ Süla ukoe kemiakokecü pie uko cü chü kelieya; zhosuo pie u pfhenei tuoi uko whepfü tuoya.

⁷ Luo pie uko mhi rüla tuoya, kenya se uko melou tshu tuoya.

⁸ Ukoe mha krenyü mu kelhie die puya; ukoe kerüzha di mia kede, mia neketetaya.

⁹ Uko tie pie teigei kepetsou die puya, mu uko meüko bu kijüu gei houtuoya.

¹⁰ Süla themiako sie uko tsheya; mu uko gei kekrü ücü ngulie motaya.

¹¹ Sidi ukoe sie, “Kepenuopfüe kikidi silie ta? Kerükrietho-u gei mhasimhale nyi üme?”

¹² Harie, kerüzhümia haiya; rüütshüi di, uko kinyi kra kechülieya.

¹³ A we a nou chü kemesapie keba thedochü; mu kejo kejü nunu a dzie meteikewa rei thedo.

¹⁴ Zhate thesa a va, teisoduü a pechü.

¹⁵ Ae sie, “A haicü putuo,” ishü ro, n nuonuoko phou nu dietho kemo chüwata rei si mo.

¹⁶ Derei a kimhiei di hau silietie shi idi le kesie ki, süu a nyiekecü mhatho puoketa ngulie;

¹⁷ a Ukepenuopfü kemesachüu nu vo kemochie; süze a uko thelau silie.

¹⁸ No uko khapie kerünyü thechüko nu shüwata tou zo; no uko bu te keka nu tsute.

¹⁹ Uko bu kiki zo di dopuo nu kate shi, kemichieko bu uko tsho tseiwate!

²⁰ Ukoe u mho kepema puo tuoi zo, Niepuu co sierkelie ki noe uko khrüko rütseya.

²¹ A ruopfü rünou mo, tsiu a melou chüteiketa ki;

²² a nya mu mhasi mo se, a n mhodzünu khunuo puo mhieta.

²³ Sishierei a n ze sei tuo zo; no a dzie a zatsa thezese tuo.

²⁴ No n mhasiu pie a cha thashüya, sidi kenuotsa therhu nunu a zelietuo.

²⁵ A la teigei sü n sie supuo nyi ga? Tsiu kijü nu rei no kemosie a kemengu kekrei tuo mo.

²⁶ A chü mu a melou thachütalie vi; derei Ukepenuopfü a melou kekuou mu kechachie a yau zo.

²⁷ N kinu pecie tuoketako katatuo; noe n gei dietho kemoko pekawaya.

²⁸ Derei a la we Ukepenuopfü penuokelie we vi; ae kerükrietho Jihova pie a keyau chüliete, a bu n mhatho peteko pu phreshülieketuo la.