Chieliko 72 - Angami Naga CL (Re-edited) Bible (BSI)

Kemiatho Kediu Kedi Kechü

¹ No n kethocau pie kediu tsücie, Harie Kepenuopfü, mu n kemiatho-u pie kediu nuo tsücie.

² Puo bu kemiatho se n themiako mu kethocau se ketsopfhüko nyie pepishücie.

³ Kijüthouko bu kruokelie se themiako tsücie, mu kemiatho se kijükhruko gei shücie.

⁴ Puo bu themiako donunu kejümiako yashücie, mu ketsopfhü nuonuoko kelashücie, tsiu mia peseyakezhako getshieshücie.

⁵ Niakiu mu khrüu keba chie, thephou pete nu puo bu rhei tuo üthienyü.

⁶ Puo bu nha rekewako gei teirü tsurcü tuoi, mu teirüe kijü vakeshü tuoicie.

⁷ Puo teiki kemiathomia bu kruoliecie; mu khrü jüta kemochie nouneu bu bacie.

⁸ Puo bu dzükezha nunu vo dzükezha ketso kekhacie; tsiu Kerüu nunu kijü kela ketso.

⁹ Puo ngumvüko bu puo mhodzü nunu nerhutsucie; tsiu puo ngumvüko bu nyophe meyocie.

¹⁰ Tarshish nu tsiu kijü rüchütsokemoko nu kediko bu puo khruo khruocie; Sheba mu Seba nu kediko bu mha se vor puo tsücie.

¹¹ Kedi pete bu puo mhodzünu nerhutsucie, mu seyie pete bu puo lie chücie.

¹² Puoe ketsopfhüko meliekeshü ki u kelashüyakecü la; tsiu kejümia u kekhruo tuo kemomia rei.

¹³ Puo kethachüko mu ketsopfhümia ngumezhieya, tsiu ketsopfhüko kerheiro kelashüya.

¹⁴ Puoe mia u kepese mu zhosuo nunu u kerheiro kelashüya, puo mhodzüki uko zie puoma recü la.

¹⁵ Puo bu rhei kechau chücie! Sheba nu suna pie puo tsücie! Mia bu puo la cha sei bacie, mu zhate japie puo tsücie.

¹⁶ Kijüu nu lhacülhale bu menhoulie üthienyü; kijüthouko tsüle geinu hekeyopfü di; puo nhasi bu Lebanon tuoi kruoliecie; mu nadiko nu themiako bu lie nu nha tuoi kruo parkelieu chücie.

¹⁷ Puo za bu kechachie tuocie; niaki keba chie tuocie. Seyie pete bu puo geinu theja ngucie, mu uko bu puo üse thejakepfüu üdi pucie.

¹⁸ Jihova, Israelko Kepenuopfü tsheliecie, puo rübei ungomhatho chüyakezhau.

¹⁹ Kechachie puo za bu kemeyieu chücie; puo zapuzayie bu kijü pete ketshu chücie. Amen mu Amen.

²⁰ Jese nuou David kechako tseiliete.